Дырэктарка літоўскага Дэпартамента міграцыі: Кожны дзень каля 10-20 расіян і беларусаў выказваюцца за вайну
Пасля таго, як уступіў у сілу парадак, згодна з якім грамадзяне Расіі і Беларусі, якія жадаюць атрымаць дазвол на жыхарства ў Літве або нацыянальныя візы, павінны запаўняць спецыяльную анкету, кожны дзень ад дзесяці да дваццаці рэспандэнтаў адзначаюць, што падтрымліваюць вайну ва Украіне, якую развязала Расія. Пра гэта паведаміла дырэктарка Дэпартамента міграцыі Эвеліна Гудзінскайце.
«Цяпер мы ўсім грамадзянам Расіі і Беларусі, а таксама асобам іншых нацыянальнасцяў даём запоўніць анкету. Там мы просім іх падрабязна расказаць пра сваё мінулае, пра сувязь з вайсковымі разведвальнымі структурамі, выказаць свой пункт гледжання на вайну ва Украіне.
І мяне вельмі здзівіла тое, што мы атрымліваем адносна вялікую колькасць заяў — ад 10 да 20 штодзень, што яны ўхваляюць вайну, падтрымліваюць тое, што адбываецца ва Украіне», — сказала Эвеліна Гудзінскайце.
Дырэктарка Дэпартамента міграцыі падкрэслівае, што такім асобам дазвол на жыхарства ў Літве не выдаецца. Тыя, хто выступае за вайну, павінны пакінуць Літву.
Не ідзе ў залік і «апалітычнасць»:
«Задаецца пытанне пра тое, каму належыць Крым і як яны ацэньваюць вайну, распачатую Расіяй. А некаторыя кажуць, што яны апалітычныя, што іх гэта не цікавіць. Але калі ты ў такой сітуацыі і ідзе вайна, то нельга сядзець на двух крэслах», — падкрэсліла чыноўніца.
Яна лічыць, што на неадназначнае выказванне некаторых асоб аб развязанай Расіяй ва Украіне вайне могуць паўплываць іх дагэтуль існуючыя сувязі з Крамлём. Напрыклад, паводле яе слоў, расіяне, якія падтрымліваюць Украіну, могуць страціць пенсію ў Расіі.
Таксама, адзначае Гудзінскайце, у многіх выпадках просьбы чалавека не задавальняюцца па іншых прычынах, у тым ліку і пасля кансультацыі з органамі бяспекі.
«Мы дэталёва ацэньваем прадстаўленую інфармацыю, і калі будзе ўстаноўлена, што чалавек уяўляе пагрозу дзяржаўнай бяспецы або грамадскаму парадку, прымаецца рашэнне аб адмове ў выдачы дазволу на жыхарства і яго дэпартацыі», — сказала Э. Гудзінскайце.
Каментары