Міністр абароны Брытаніі ўласнаручна праверыў танкі, на якіх вучацца ваяваць украінцы ФОТА
Міністр абароны Брытаніі Бэн Уолес наведаў базу Бовінгтан-Кемп, дзе ўкраінскія танкісты вучацца ваяваць на брытанскіх танках Challenger 2, партыю якіх Лондан абяцаў перадаць Узброеным сілам Украіны. Ён сам праінспектаваў гэтыя танкі.
Урад Брытаніі пачаў паступова «разаграваць» ваенную прамысловасць краіны, у прыватнасці, вытворчасць снарадаў, каб дапамагаць Украіне і папаўняць уласныя запасы. Пра гэта сказаў агенцтву Reuters міністр абароны.
«Мы заключылі кантракты з нашымі вытворцамі боепрыпасаў і ўжо пачалі атрымліваць першыя партыі і для папаўнення нашых запасаў, і для Украіны», — сказаў Бэн Уолес, адказваючы на пытанне пра тое, ці можа Брытанія вырабляць боепрыпасы ў дастатковай колькасці.
Па словах Уолеса, цяпер і Брытанія, і іншыя заходнія краіны вырашаюць, як стымуляваць сваю ваенную прамысловасць.
«Ведаеце, раней мы сядзелі на сваіх запасах [боепрыпасаў], здымалі з іх пыл, думалі: ці будзе гэта [спатрэбяцца яны] калі-небудзь? А цяпер у нас — нашмат больш агрэсіўная і небяспечная Расія на краі Еўропы, і гэта прымусіла ўсіх засяродзіцца», — сказаў Уолес.
Міністр пацвердзіў, што 14 абяцаных танкаў Challenger 2 Украіна атрымае гэтай вясной, а затым Брытанія, верагодна, зможа даць украінцам яшчэ некалькі танкаў.
«Расія прымяняе тактыку мясарубкі. Разумееце, расійская армія не беражэ людзей, яна кідае іх у мясарубку. І, баюся, у гэтым годзе нам прыйдзецца паклапаціцца пра тое, каб гэтая тактыка не аказалася паспяховай», — сказаў Бэн Уолес.
Каментары