Выйшаў з друку новы нумар 30-ы нумар, альманаху "Запісы Беларускага Інстытуту Навукі й Мастацтва", якія выдаюцца з 1952 г.
30-ы нумар альманаху прысьвечаны двум 80-гадовым юбілярам: гісторыку Янку Запрудніку і а. Аляксандру Надсану. У часопісе друкуюцца біяграфічныя нарысы пра іх, поўныя бібліяграфіі, а таксама выбраныя артыкулы гэтых аўтараў. Сярод тэкстаў а. Аляксандра Надсана «Сьвяты Кірыла Тураўскі», «Беларусы ў Грэцкай Калегіі», «Малітвы Скарыны», «Чарнобыль. Наш боль... Наш доўг», а таксама казаньні, прамоўленыя ў часе багаслужбаў ў грэка-каталіцкай царкве сьв. Пятра і Паўла ў Лёндане.
Найбольш значны з апублікаванага ў «Запісах» даробку д-ра Янкі Запрудніка тэкст «Спробы адраджэньня і аўтарытарная рэакцыя» (1994–1996), які зьяўляецца апошнім разьдзелам з кнігі «Беларусь на гістарычных скрыжаваннях», што падчас выданьня кнігі ў Менску ўвосень 1996 г. быў зьняты друкарняй. Акрамя таго ў часопісе публікуюцца прыклады паэтычнай спадчыны Янкі Запрудніка (пісаў пад псэўданімам С. Ясень) – ягоныя эпітафіі вядомым дзеячам беларускай эміграцыі.
Сярод іншых «запісаўскіх» тэкстаў – аналіз беларускіх дыяспараў Натальляй Гардзіенкай; артыкул Лявона Юрэвіча пра авантурыста-патрыёта, лідэра Беларускага Вызвольнага Руху Людвіга Галубовіча-Зарэчнага; сьпіс беларускіх сьвятароў, што знаходзіліся ў Нямеччыне ў 1945 г.
У «Эпісталярыях» друкуюцца лісты экс-кіраўнічкі СБМ Надзеі Абрамавай-Тэадаровіч да жонкі Дзмітрыя Касмовіча – і пляменніцы Якуба Коласа –Надзеі Касмовіч-Міцкевіч, а таксама некалькі лістоў Міхася Забэйды Суміцкага.
У разьдзеле «Літаратура» апублікаваныя ўрыўкі з «Аўгена Анегіна» ў перакладзе Натальлі Арсеньневай ды вершы Вальжыны Морт. Тамсама пасьлямова Янкі Юхнаўца да аповесьці «Яно».
Акрамя таго, гэты нумар «Запісаў» зьмяшчае агляд кніг эміграцыйнай тэматыкі, што выйшлі цягам двух апошніх гадоў.
Каментары