«Байсол» пачаў рабіць рассылкі данатарам. У людзей узніклі пытанні да бяспекі такіх лістоў
«Байсол» з нядаўняга часу робіць рассылку для тых, хто раней данаціў у фонд. З улікам таго, што за данаты цяпер заводзяць крымінальныя справы, у многіх узнікла пытанне — ці гэта бяспечна? Ці прыходзіць такая рассылка людзям, якія знаходзяцца ўнутры краіны? Як ад яе можна адпісацца? «Наша Ніва» спытала ў кіраўніка фонду Андрэя Стрыжака.
На рассылку звярнулі ўвагу чытачы «Нашай Нівы». Публічна тэму ўзняла таксама блогерка Саша Зверава, якая раней працавала ў фондзе.
«Я рабіла ахвяраванні ў фонд, але пацешны факт: я не давала згоду на рассылку. Я не тыкала ні на якія птушачкі, я проста здзяйсняла ахвяраванне ў страйп (плацежная сістэма. — НН). Гэта значыць, мой email проста выгрузілі адтуль. А вы выпадкова цяпер не парушылі еўрапейскае заканадаўства?» — абурылася яна ў фэйсбуку.
«Галоўнае пытанне. Калі вы робіце гэтую сваю рассылку, як вы разумееце, што чалавек не знаходзіцца на тэрыторыі Рэспублікі Беларусь? Ёсць нейкія прыкметы?» — закранула блогерка момант бяспекі.
«Байсол» у каментары «Нашай Ніве» запэўнівае, што ажыцяўляе рассылку паводле адфільтраванага спіса адрасоў, з якога выключаны донары, якія фізічна на момант данату знаходзіліся ў Беларусі.
«Рассылка ідзе па тых людзях, якія актыўна данацяць ці данацілі праз «Байсол», якія не робяць і не рабілі гэта з Беларусі, якія данацілі ў апошні час. Некалькі фільтраў і некалькі спісаў рассылкі.
Рассылка ажыццяўляецца па спісе данатараў, якія рабілі данаты пасля прызнання нашай арганізацыі «экстрэмісцкай»,
гэта значыць, што людзі свядома працягвалі карыстацца магчымасцю аказваць дапамогу праз «Байсол», нягледзячы на патэнцыйны пераслед з боку ўлад», — кажа Андрэй Стрыжак.
Ён адзначае, што рабіць рассылку фонд вырашыў пасля кансультацый з юрыстамі.
«Яны падцвердзілі нам такую магчымасць, бо адрасы пошты мы атрымліваем праз плацежную сістэму Stripe, калі чалавек ажыццяўляе плацеж. Мы ўлічваем тыя пытанні, якія атрымліваем ад людзей у сувязі з рассылкай і вядзём кансультацыі з юрыстамі, каб удасканальваць нашую працу ў гэтым кірунку», — расказвае Андрэй Стрыжак.
Ён таксама падзякаваў тым, хто данаціць пацярпелым і падтрымлівае каманду.
Ад рассылкі «Байсол» можна самастойна адпісацца.
У канцы кожнага ліста ёсць дысклэймер. Можна націснуць на кнопку «Unsubscribe from this list» і адпісацца.
Чытайце таксама:
Ці бяспечна рабіць ахвяраванні праз Stripe?
Сталі вядомыя мінімальныя сумы «кампенсацыі» за данаты з неайцішнікаў
Пракуратура налічыла 30 мільёнаў рублёў шкоды ад дзейнасці Nexta
Некаторым палітвязням да палітычных артыкулаў дадаюць крымінальную справу за парнаграфію
Цяпер чытаюць
33-гадовы Даніла Гаркавы, які нечакана пакінуў Офіс Ціханоўскай, расказаў пра сваю анкалогію і сем аперацый2
33-гадовы Даніла Гаркавы, які нечакана пакінуў Офіс Ціханоўскай, расказаў пра сваю анкалогію і сем аперацый
«Мінімальны заробак доктара ў Польшчы большы, чым я мела ў беларускім прыватным цэнтры». Доктарка Маркелава — пра працу ў польскай бальніцы і выраб натуральнай касметыкі1111
Каментары