Літва сцвярджае, што спыніла імпарт падсанкцыйнай драўніны з Беларусі і Расіі
Мытная служба Літвы заявіла, што пасля ўзмацнення мытнага кантролю яна цалкам ліквідавала імпарт расійскай і беларускай драўніны і лесапрадукцыі, які рабіўся ў абыход санкцый праз Казахстан і Кыргызстан.
«З мэтай прадухілення гэтых злоўжыванняў і ў адпаведнасці з тлумачэннямі Еўрапейскай камісіі ў канцы мінулага года мытныя органы Літвы ўзмацнілі кантроль за такімі таварамі, узмацніўшы праверку прадстаўленых дакументаў і маршрутаў транспартавання ў пунктах кантролю на мяжы з Рэспублікай Беларусь і Калінінградскай вобласцю Расійскай Федэрацыі», — адзначаецца ў паведамленні.
Акрамя надглядных праверак, ад імпарцёраў на мяжы з Літвой пачалі патрабаваць, каб тавар суправаджаўся дакументамі, якія пацвярджаюць паходжанне тавару, у прыватнасці яго вытворцы і адрас месца вырабу.
«У адным выпадку месцам вырабу быў пазначаны шматкватэрны дом, а ў іншых выпадках у кіроўцаў было выяўлена некалькі камплектаў дакументаў, частка з якіх была адрасаваная беларускай, а частка — літоўскай мытні», — адзначае мытная служба Літвы.
Раней СМІ апублікавалі расследаванні з выкрыццём схем абыходу санкцый, уведзеных Захадам супраць вырабленай у Беларусі і Расіі драўніны, выкарыстоўваючы кампаніі-пракладкі, зарэгістраваныя ў Казахстане і Кыргызстане.
Цяпер чытаюць
На Купянскім кірунку загінуў беларускі добраахвотнік Аляксей «Рыжы» Аўдзей11
Каментары