На мяжы з Польшчай амаль зніклі чэргі з легкавікоў. Чаму так адбываецца?
Велізарныя чэргі ў пункце пропуску «Брэст — Тарэспаль» на беларуска-польскай мяжы сталі звыклай з'явай. Асабліва пасля таго як польскі бок прыпыніў працу пункта пропуску «Баброўнікі». Людзі наўпрост суткамі стаялі, каб з'ездзіць у Польшчу і назад. Апошнімі днямі сітуацыя змянілася. «Наша Ніва» разабралася, чаму так адбываецца.
Да гэтага тыдня чэргі з 250-350 машын на выезд з Беларусі ў пункце пропуску «Брэст» былі звычайнай справай. Праз гэта на мяжы нават актывізаваўся новы від бізнэсу, калі людзі за пэўную ўзнагароду прапанавалі пастаяць за вас у чарзе. Яны маглі рабіць гэта як на вашым аўто, так і на сваім.
Але на гэтым тыдні сітуацыя змянілася. Чэргі сталі невялікімі, а ў нейкія гадзіны цалкам адсутнічаюць.
Знікненне велізарных чэргаў выклікала здзіўленне ў аматараў паездак у Польшчу. Гэтую тэму актыўна абмяркоўваюць і карыстальнікі адмысловых тэлеграм-чатаў. Падарожнікі дзеляцца здымкамі і інфармацыяй, што на мяжы пуста ці амаль пуста.
Людзі агучваюць дзве асноўныя прычыны, чаму так адбываецца. Спойлер: гэта не больш хуткая праца польскіх і беларускіх памежнікаў і мытнікаў.
Асноўная версія — польскі бок апошнім часам узмацніў кантроль за перавозкай цыгарэт з Беларусі. Праз гэта, на думку карыстальнікаў чатаў, на мяжы зніклі цыгарэтныя кантрабандысты.
Другая версія — умацаванне польскай валюты. Калі ў першы дзень лета за 1 даляр давалі 4,2 злотага, то цяпер толькі 4. Гэта робіць паездкі па закупы менш выгаднымі.
З другога боку, умацаванне злотага да даляра і еўра, наадварот, павялічвае прыбытак ад кантрабанды паліва і цыгарэт. Але, як паказвае статыстыка чэргаў на мяжы, ахвотных падзарабіць на кантрабандзе болей не стала. Таму цалкам імаверна, што значнае змяншэнне чэргаў адбываецца якраз праз больш пільную ўвагу польскага боку да ўвозу цыгарэт з Беларусі.
Тым часам па стане на 18 гадзін 22 чэрвеня выезду з Беларусі ў Польшчу чакаюць усяго каля 10 легкавікоў. Для параўнання: тыдзень таму ў гэты час на мяжы было 345 легкавых аўто.
Страхоўкі для ўезду ў ЕС істотна падаражэлі, а набыць іх па-ранейшаму складана. Новыя цэны і нюансы
-
«Калі цяпер херова, значыць, гэта яшчэ не канец». Пагутарылі з эпатажным «святаром XXI стагоддзя», пра якога не было чуваць пяць гадоў пасля арышту
-
«Адну мяне бесіць, што за мяжой я выключна ІрЫна?» Беларуска абураецца транслітэрацыяй у пашпарце з беларускай мовы
-
У Лідзе памёр 71-гадовы мужчына. Яго сын, зборшчык подпісаў за Цапкалу, кажа, што бацьку закатавалі да смерці. Ці так гэта?
Каментары