«Я нават ганаруся імі». Азараў патлумачыў, адкуль у яго юбілейны медаль вайсковай разведкі
Прадстаўнік Пераходнага кабінета па аднаўленні правапарадку Аляксандр Азараў атрымаў памятны нагрудны знак «Вайсковая разведка Рэспублікі Беларусь. 95 гадоў» у рамках абмену падарункамі паміж сілавымі ведамствамі. Пра гэта ён распавёў Reform.by.
На медаль звярнулі ўвагу тэлеграм-каналы, якія спецыялізуюцца на дыскрэдытацыі дзеячаў дэмакратычнай супольнасці Беларусі.
«У МУС была такая традыцыя — два разы на год у Дзень міліцыі і Дзень утварэння падраздзяленняў па барацьбе з арганізаванай злачыннасцю і карупцыяй — супрацоўнікаў ГУБАЗіКа збіралі і ўручалі памятныя падарункі. Нам прыносілі розныя бутафорскія медалі: у памяць заканчэння вайны ў Афганістане, юбілейныя значкі КДБ, арміі, мытні. Потым кіраўнік ГУБАЗіКа размяркоўваў іх сярод падначаленых. Многія не хацелі іх браць, бо ну якая вайна ў Афганістане. У адзін з такіх дзён мне і ўручылі нагрудны знак з нагоды юбілею вайсковай разведкі», — тлумачыць Азараў.
Reform.by не ўдалося знайсці гэты памятны знак у Дзяржаўным геральдычным рэгістры. Там афіцыйна зарэгістраваны аналагічныя медалі толькі на 90– і 100-гадовы юбілеі вайсковай разведкі.
Азараў нагадаў, што фота кіцеля з медалямі апублікаваў ён сам і не хавае гэтага.
«У мяне ёсць і сапраўдныя дзяржаўныя ўзнагароды. Я гэтага не хаваю і нават ганаруся імі», — удакладніў ён.
Азараў не змог успомніць, калі атрымаў памятны знак, але паабяцаў паглядзець дакументы пазней.
Фота кіцеля з медалямі стала асновай для «расследавання» аднаго з тэлеграм-каналаў. У 45-старонкавым тэксце Азараў абвінавачваецца ў працы на ГРУ Генштаба Мінабароны і спробе кампраметаваць дэмакратычны рух. Па сутнасці, усё «расследаванне» будуецца на нагрудным знаку. Астатняе — галаслоўныя абвінавачванні і сведчанні ананімных крыніц. Ёсць яшчэ адзін «дакумент», апублікаваны ў «расследаванні» — нібыта даведка-аб'ектыўка з апошняга месца службы А. Азарава ў МУС Беларусі. Гэта фотакопія трох лістоў машынапіснага тэксту без дадатковых даных і подпісаў. Сапраўднасць «дакумента» пацвердзіць немагчыма. У ім пералічаны месцы службы Азарава, а таксама запіс аб тым, што з 10.2018 па 07.2019 ён нібыта знаходзіўся ў распараджэнні міністра абароны Рэспублікі Беларусь.
«У гэты час я быў начальнікам 3-га аддзела 10-га ўпраўлення ГУБАЗіКа», — коратка адказаў Азараў на пытанне аб 2018-м і 2019-м гадах.
46-гадовы Аляксандр Азараў — прадстаўнік аб'яднання былых беларускіх сілавікоў «Байпол» (арганізацыя нядаўна раскалолася на дзве). У мінулым узначальваў 3-е ўпраўленне ГУБАЗіКа па супрацьдзеянні наркагандлю і гандлю людзьмі, падпалкоўнік міліцыі. Пасля адыходу з гэтага месца службы быў выкладчыкам у Акадэміі МУС. Адтуль звольніўся пасля 9 жніўня 2020 года, як сам казаў, узрушаны гвалтам з боку сілавікоў над пратэстоўцамі.
З'яўляецца прадстаўніком створанага Святланай Ціханоўскай Аб'яднанага пераходнага кабінета па аднаўленні правапарадку.
Лукашэнка пераабуўся: Позна ўвечары Мінск пагрузілі ў цемру. Навошта? Я ж ад вас гэтага не патрабаваў20
Каментары