«У мяне ёсць для цябе віскі». Брытанскі міністр Бэн Уолес расказаў, як пакпіў з Шайгу, а той таго не ведаў
У інтэрв'ю выданню The Times міністр абароны Вялікабрытаніі Бэн Уолес расказаў пра свой таемны жарт з міністра абароны Расіі Сяргея Шайгу, элементам якога было шатландскае віскі.
Паводле слоў Уолеса, яшчэ да пачатку вайны ва Украіне, калі Лондан і Кіеў яшчэ не патрапілі ўсталяваць надзейную шыфраваную сувязь, ён дамовіўся са сваім украінскім калегам Аляксеем Рэзнікавым закадаваць назвы ўзбраенняў, якія пастаўляюцца Украіне, маркамі шатландскага віскі — у памяць пра сваю колішнюю службу ў шатландскай гвардыі.
Так супрацьтанкавыя ракеты NLAW сталі ў перапісцы называцца Glenfiddich (аднасоладавае віскі з усходу Шатландыі), а супрацькарабельныя ракеты Harpoon сталі Islay.
«Я проста пісаў яму: «У мяне ёсць для цябе віскі» ці «Віскі ўжо ў дарозе». Мы, два міністры, проста выбралі для сябе кодавыя словы», — расказаў Уолес.
У сярэдзіне лютага, менш чым за два тыдні да пачатку ваенных дзеянняў, Уолес прыехаў з візітам у Маскву. У якасці падарунка расійскаму міністру Сяргею Шайгу ён прывёз бутэльку віскі:
«Мы абменьваліся падарункамі, і я падарыў яму бутэльку Glenfiddich. Ён не ведаў, што гэта значыць. Такі быў жарт».
Дарэчы, у гэтым самым інтэрв'ю Бэн Уолес, які вядомы актыўнай падтрымкай Украіны ў яе супраціве расійскай агрэсіі, пацвердзіў інфармацыю, што ён прыняў рашэнне пакінуць сваю пасаду ў найбліжэйшыя месяцы. Паведамленні пра яго рашэнне пачалі з'яўляцца ў брытанскіх медыя з учарашняга дня.
Уолес сказаў, што пакіне сваю пасаду тады, калі прэм'ер-міністр Рышы Сунак будзе праводзіць чарговыя перастаноўкі ва ўрадзе. Гэта можа адбыцца ў верасні.
Цяпер чытаюць
Што кажуць Мацкевіч, Карпаў, Чарняўская і іншыя пра прэс-канферэнцыю Бабарыкі і Калеснікавай30
Што кажуць Мацкевіч, Карпаў, Чарняўская і іншыя пра прэс-канферэнцыю Бабарыкі і Калеснікавай
Бабарыка і Калеснікава пагаварылі з Інгай Ругінене і заклікалі Літву «далучыцца да дыпламатычных намаганняў ЗША» і «не прапусціць акно магчымасцей»2828
Каментары