Падатковая ў Брэсце злавіла мужчыну, які прадаў месца ў чарзе на мяжы ў Польшчу. Мужчына апублікаваў паведамленне ў тэлеграм-канале, на якое і прыехалі супрацоўнікі падатковай інспекцыі. «Ганцавіцкі час» пацікавіўся, ці можна легальна прадаваць месцы ў чарзе, каб не мець праблем з падатковай?
Жыхар Брэсцкага раёна за сваё месца ў чарзе хацеў атрымаць 100 рублёў, але не ведаў, што пакупнікамі аказаліся падаткавікі. У выніку яму прад'явілі да аплаты адзіны падатак у памеры 3 400 рублёў. Таксама, на першы раз, ён пісьмова папярэджаны аб мерах адміністрацыйнай адказнасці.
А ці можна легальна прадаваць чаргу на мяжы?
Каб даведацца гэта, «Ганцавіцкі час» патэлефанаваў у падатковую ў Брэсце. Аднак там адразу не змаглі патлумачыць, як можна афіцыйна зарэгістравацца, каб прадаваць чаргу. Параілі звярнуцца ў Белстат для вызначэння кода віду дзейнасці.
«У нас ужо было гэтае пытанне пасля рэйдаў падатковай. Высветлілі, што будзе код віду дзейнасці 96090. Аказанне іншых індывідуальных паслуг, не ўключаных у іншыя групоўкі», — патлумачыла спецыялістка Белстата.
Зноў патэлефанавалі ў падатковую і задалі пытанне, як зарэгістравацца з гэтым кодам, якое будзе падаткаабкладанне. Супрацоўніца інспекцыі патлумачыла, што ў гэтым выпадку могуць быць на выбар два віды — адзіны падатак ці падаходны.
У чым розніца: адзіны ці падаходны
«Адзіны падатак — гэта выплачваць у месяц фіксаваную стаўку. У залежнасці ад таго, дзе вы будзеце ажыццяўляць дзейнасць. Наперад падаеце дэкларацыю, паказваеце ў ёй месяцы, у якіх вы будзеце працаваць. І штомесяц на працягу квартала выплачваеце стаўку. У Брэсце за месяц гэта 680 рублёў.
Калі ж гэта падаходны падатак, то вы павінны будзеце падаваць дэкларацыю па заканчэнні квартала. Там улічваюцца вашы даходы і выдаткі. З сумы розніцы ў вас будзе вылічвацца 20% ад чыстага прыбытку», — распавяла супрацоўніца падатковай інспекцыі.
Не забыцца купіць касавы апарат
Удакладнілі ў падатковай таксама, якія выдаткі можна ўлічваць пры працы па падаходным падатку, калі прадаваць чаргу на мяжы.
«Калі ўлічваць запраўку, то аўтамабіль павінен стаяць на ўліку, як асноўны сродак ІП. Сваім рашэннем уводзіце ў прадпрымальніцкую дзейнасць, ставіце як асноўны сродак на ўлік і спісваеце амартызацыю. Для паліва ў вас павінен быць альбо дамова з АЗС, альбо карпаратыўная карта, прывязаная да разліковага рахунку ІП. Таксама можна ўзяць на выдаткі аўтазапчасткі, рамонт», — распавяла супрацоўніца падатковай інспекцыі.
Акрамя таго, для продажу чаргі на мяжы ІП павінен мець касавы апарат для прыёму наяўных грошай. Абслугоўванне касавага апарата, куплю касавай стужкі можна ўключаць у выдаткі па падаходным падатку.
А ці можна прадаваць чаргу ў зоне чакання?
Такім чынам, аказваецца, легальна прадаваць чаргу можна. І калі такому прадаўцу іншыя людзі, якія стаяць у чарзе, захочуць зрабіць рукапрыкладства, то смела можна адбівацца дакументамі, што вы «афіцыял»! Дапусцім, зарэгістраваліся, а ці можна прадаць чаргу ў зоне чакання? Там, верагодна, удалося б прадаць даражэй. Пра гэта спыталіся ў «Белмытнясэрвісе».
«У нас такога няма. Рэгістрацыя транспартных сродкаў у чарзе рэгламентаваная пастановай Савета Міністраў. Пішыце афіцыйны запыт, да нас не звярталіся па такім пытанні», — растлумачылі там.
Верагодна, у зоне чакання няма тэхнічнай магчымасці прадаваць чэргі. Але нічога, да яе можна зарабіць на продажы 50-100 рублёў. Засталося толькі разлічыць, колькі разоў на месяц можна прадаць чаргу. І ці будзе гэта выгадна пасля выплаты падаткаў.
«Сабралася і паехала». Дзяўчына з Кобрына рванула на апошні сеанс «Барбі» ў Белай Падляшскай. Ролік з яе прыгодамі вірусіцца ў тыктоку
У Літве папрасілі прэзідэнта не выганяць з краіны беларускіх дальнабойнікаў
Як выглядае эканамічнае супрацоўніцтва Польшчы з Беларуссю напярэдадні магчымага закрыцця межаў. Здаецца, Польшчы ёсць што губляць
Цяпер чытаюць
Кіраўнік Ліды заклікаў сілавікоў не спыняць палітычных рэпрэсій28
Каментары