У Жыровіцкім манастыры адрэстаўруюць іканастас, з якога раней выкінулі беларускія абразы
У Свята-Успенскім саборы Жыровіцкага манастыра адрэстаўруюць барочны іканастас XVIII стагоддзя, які ў мінулыя дзесяцігоддзі зведаў радыкальную русіфікацыю.
Цяпер завяршаюцца рамонтныя работы ў Жыровіцкім Свята-Успенскім саборы. Паводле слоў намесніка міністра культуры Сяргея Саракача, да 2025 года, акрамя бягучага рамонту ў храме, плануецца выканаць рэстаўрацыю і аднаго з найстарэйшых у краіне іканастаса.
У Жыровічы ўжо выязджалі спецыялісты Нацыянальнага мастацкага музея, супрацоўнікі «Белрэстаўрацыі», якія вывучалі сітуацыю. Было праведзена абследаванне стану іканастаса, выяўлены тыя элементы, якія неабходна аднавіць або поўнасцю замяніць. Работы, на думку намесніка міністра, чакаюцца сур'ёзныя. Ён спадзяецца, што сродкі на іх будуць адшуканы.
Першапачаткова ва Успенскім саборы быў толькі цэнтральны іканастас, пабудаваны каля 1730 года, які добра захаваўся да нашых дзён. У 1779 годзе для роспісу гэтага іканастаса, як і іканастаса Яўленскай царквы, быў запрошаны майстар Рыгор Мядзведскі. Іканастас сабора выкананы ў характэрным стылі барока. Звяртаюць на сябе ўвагу абразы апосталаў, цэнтральная выява «Спаса Уседзяржыцеля» ў сярэбранай раме. Бакавы іканастас храналагічна адносіцца да рамонту храма ў 60-я гг. XIX ст., як і сярэбраныя шаты на абразах.
У 2009 годзе па благаславенні Патрыяршага Экзарха ўсяе Беларусі Мітрапаліта Мінскага і Слуцкага Філарэта сем старадаўніх абразоў з іканастаса Успенскага сабора былі перададзены Жыровіцкім манастыром у Нацыянальны мастацкі музей Рэспублікі Беларусь. Барочныя абразы былі заменены на сучасныя, якія выкананыя ў нібыта «старажытнарускім стылі» інакіняй Анфісай. Гэтыя абразы з’яўляюцца дысгарманічнымі ў дачыненні да барочнага іканастаса і барочных інтэр’ераў храма.
Ці вернуцца ў рамках рэстаўрацыі гістарычныя абразы або іх копіі, намеснік міністра культуры не паведаміў.
Цяпер чытаюць
«Лукашэнка на мінімалках». «Беларускі каханак усяе Русі» стаў кумірам жаночага тыктока1
«Лукашэнка на мінімалках». «Беларускі каханак усяе Русі» стаў кумірам жаночага тыктока
Пагражаў вайскоўцам раскрыць, хто з іх гомасэксуал, каб выпытаць сакрэты і прадаць Украіне. Вось за што адыёзны функцыянер БРСМ атрымаў 17 гадоў калоніі1212
Каментары