Грузія, Казахстан і нават Люксембург маюць рэальны шанец прабіцца на Еўра-2024
Каманды не змаглі прабіцца на чэмпіянат Еўропы па футболе падчас адборачнага турніру, але маюць шанец трапіць на кантынентальнае першынство праз стыкавыя матчы Лігі нацый.
Грузія фінішавала ў групе А на 4-м месцы, прапусціўшы наперад Іспанію, Шатландыю і Нарвегію. Тут на Еўра па выніках адборачнага турніру едуць Іспанія і Шатландыя, а Нарвегія з Эрлінгам Холанам наогул скончыла барацьбу.
Казахстан у сваёй групе змагаўся да апошняга і скончыў адбор трэцім з 18 баламі ў групе H (тут прамыя пуцёўкі на кантынентальнае першынство атрымалі Данія і Славенія). Столькі ж (18 балаў) набрала Фінляндыя.
Люксембург у групе з Партугаліяй, Славакіяй, Босніяй, Ісландыяй і Ліхтэнштэйнам фінішаваў трэцім.
Але Казахстан, Грузія, Люксембург і Фінляндыя маюць шанец прабіцца на Еўра-2024 праз стыкавыя матчы Лігі нацый (турнір заснаваны УЕФА некалькі гадоў таму).
Гэта 11 камандаў (Польшча, Эстонія, Фінляндыя, Украіна, Ісландыя, Ізраіль, Боснія, Грузія, Казахстан, Люксембург, Грэцыя), якія паказалі добрыя вынікі ў тым турніры.
Сёння таксама вызначыцца, Харватыя ці Уэльс атрымаюць прамую пуцёўку на Еўра-2024, а хто будзе прабівацца праз стыкі Лігі нацый.
Зборная Беларусі ў дывізіёне С (трэці з чатырох па моцы) Лігі нацый выступіла жахліва: заняла апошняе месца за Казахстанам, Славакіяй і Азербайджанам і будзе ў сакавіку 2024 года наогул змагацца за права застацца ў ім з камандай Літвы.
Сёння позна ўвечары каманды канчаткова размяркуюцца па «шляху А», ці «шляху B» (у кожным па чатыры каманды).
Формула наступная: паўфіналы і фінал. На Еўра-2024 трапляе толькі пераможца.
«Шлях С» ужо сфармаваны: Грузія згуляе дома з Люксембургам, а Грэцыя дома з Казахстанам. Пераможцы паўфіналаў сустрэнуцца паміж сабой і вызначаць зборную, якая едзе на чэмпіянат Еўропы.
Канчатковыя ўдзельнікі шляхоў А (сюды ўжо трапіла Эстонія) і B (сюды трапілі Ізраіль і Боснія) стануць вядомыя позна вечарам. Стыкавыя матчы пройдуць у сакавіку.
Чэмпіянат Еўропы па футболе пройдзе з 14 чэрвеня па 14 ліпеня 2024 года ў Нямеччыне.
Вызначыліся 20 з 24 зборных, якія возьмуць удзел у чэмпіянаце Еўропы наступным летам. Гэта Нямеччына (гаспадыня спаборніцтваў), Іспанія, Шатландыя, Францыя, Нідэрланды, Англія, Італія, Турцыя, Албанія, Чэхія, Бельгія, Аўстрыя, Венгрыя, Сербія, Партугалія, Славакія, Румынія, Швейцарыя, Данія, Славенія.
Цяпер чытаюць
Спявачку Мэрыем Герасіменка на працягу двух гадоў збіваў муж14
Каментары