«Не могуць знайсці, дзе грошы»: беларуска сцвярджае, што яе хочуць адлічыць з маскоўскай ВНУ праз збой банка
Беларуска паспяхова здала сесію, аплаціла вучобу і стала чакаць новых заняткаў. Але замест раскладу пабачыла ў сябе на пошце ліст з універсітэта з папярэджаннем аб тым, што яе прозвішча ёсць у загадзе на адлічэнне. Блогерка ў тыктоку сцвярджае, што трапіла ў вельмі непрыемную сітуацыю праз банкаўскую памылку.
Дзяўчына, якую завуць Крысціна, вядзе блог у тыктоку і называе сябе маркетолагам-авантурыстам з філалагічнай адукацыяй.
— Я як старанная студэнтка здала сесію без хвастоў. І думаю: дай аплачу загадзя. Сесія заканчвалася ў лютым, і я заплаціла ў пачатку студзеня. Сяджу, чакаю наступны семестр. У канцы лютага прыходзіць мне ліст з універа, што я ў спісе на адлічэнне.
Канечне, гэта навіна вельмі здзівіла дзяўчыну і яна пачала высвятляць, што ж адбылося.
− Ва ўніверсітэце мне кажуць: «Слухайце, мы вельмі лаяльныя, але, на жаль, не можам чакаць аплаты так доўга, таму вы ў загадзе на адлічэнне».
Часть1
Блогерка пачала прасіць даць ёй магчымасць высветліць, куды ж знікла аплата. Усё ж такі на коне паўгода яе жыцця: аднаўляцца — значыць, і пісаць новую курсавую, і атрымаць шмат іншых праблем на роўным месцы.
У Тэхнабанку, праз які Крысціна пералічыла грошы на рахунак ВНУ, параілі ёй напісаць запыт і два тыдні чакаць адказ.
− Я кажу: «Вы што, жартуеце ўсе?» Я еду ў банк, а мне кажуць: «Мы нічым не можам дапамагчы». Я кажу: «Дык вярніце грошы». А яны мне кажуць: «А мы не можам». Нейкую ліцэнзію яны не атрымалі і не маюць доступу да сістэмы.
У каментарыях дзяўчына ўдакладніла, што сродкі павіны былі пералічыць праз расійскую сістэму грашовых пераводаў CONTACT. На сайце Тэхнабанка напісана: «У сувязі з адкліканнем ліцэнзіі ў АТ «Ківі Банк» (Расія), які заяўлены як аператар плацежнай сістэмы Contact, праца названай сістэмы спынена».
У расійскай плацежнай сістэме «Ківі» ў канцы лютага насамрэч забралі ліцэнзію. Кашалькі замарожаныя, плацяжы не праходзяць.
Сума ў Крысціны прапала не касмічная — у наступным відэа блогерка ўдакладніла, што гаворка ідзе прыкладна пра 300 долараў. Але ж праз тое, што яна не ведала, што ўніверсітэт іх не атрымаў, у дзяўчыны пачаліся праблемы. Вучыцца Крысціна дыстанцыйна ў Маскоўскім міжнародным універсітэце — да канца вучобы ёй засталося паўтара года. Пры ўмове, вядома, што атрымаецца пазбегнуць адлічэння. Больш за ўсё блогерку абурае той факт, што ніхто не паведаміў ёй пра тое, што ўніверсітэт не атрымаў яе аплату.
За два дні відэа набрала мільён праглядаў і амаль 12 тысяч лайкаў.
А эпапея дзяўчыны працягваецца:
− Я толькі што чацвёрты раз выслухала ўсё тое самае: «Сістэма не працуе, паглядзець, каму мы перавялі грошы, а каму не, не можам. Юрысты разбіраюцца. Напішыце зноў на тую пошту, якая пазначана на сайце». Лягчэй ад гэтага не стала. Адзінае, я апісала сітуацыю ў кнізе скаргаў у надзеі, што мне на яе нехта адкажа.
Пакуль што Крысціна адправіла квітанцыю аб аплаце ў свой універсітэт разам з лістом, у якім тлумачыць сітуацыю. Яна чакае, што вырашыць кіраўніцтва ВНУ. Кажа, што калі яе сапраўды адлічаць, то блогерка пойдзе пісаць скаргу ў суд.
Цяпер чытаюць
Медыйны прэс-сакратар МНС Віталь Дамбоўскі пайшоў у псіхолагі-сэксолагі3
Каментары