У інтэрнэце забіў чарговы фантан бруду пра ўнутранае жыццё беларускіх сілавікоў.
У інтэрнэце забіў чарговы фантан бруду пра ўнутранае жыццё беларускіх сілавікоў.
На сайце belaruspartisan.org з'явіўся матэрыял-гутарка, прысвечаны карупцыі ў вышэйшых шэрагах беларускіх праваахоўных органаў.
У якасці асобы, якая раскрывае таямніцы, выступіў былы капітан МУС Вячаслаў Дудкін. Не просты опер з раёна. Калісьці ён быў набліжаным да кіраўніка міністэрства Уладзіміра Навумава і вёў справу аб фактах карупцыі ў канкурэнтнай структуры КДБ.
Аднак Навумава знялі — у выніку дзейнасці Віктара Лукашэнкі, сцвярджае Дудкін, і ў маі мінулага года капітан вымушаны быў уцячы ў Расію, дзе знаходзіцца і цяпер, хаваючыся ад беларускага камітэту дзяржбяспекі, які, паводле слоў былога капітана, шукае яго «па адмысловай схеме».
Дудкін распавядае шмат цікавага. Маўляў, міністр Навумаў быў адзіным, хто насамрэч узяўся за раскрыццё карупцыі ў КДБ. І прыводзіць канкрэтны прыклад, як мінская бізнэсвумэн Ганна Доўгая, трапіўшы за краты за ўласныя махінацыі, распавяла пра свае сувязі — усялякага характару — з палкоўнікамі КДБ М.Міхалапам і А.Мяцеліцам. Гісторыя тая заблытаная і неадназначная. Але ў выніку абодва палкоўнікі трапілі ў турму на працяглыя тэрміны. Што і пацягнула за сабой сапраўдную вайну паміж КДБ і МУС.
У гэтую вайну ўцягнутыя самыя розныя людзі: ад кіраўніка дзяржавы, які асабіста вызваліў Ганну Доўгую з турмы, да капітана Дудкіна.
Расказ Дудкіна здольны ўразіць любога нармальнага чалавека. Карціна, апісаная ім, нагадвае расійскія палітычныя дэтэктывы пачатку 90-ых. Вядома, што варта крытычна ставіцца да гэтай гісторыі. У каментарах нейкая, без сумневу дасведчаная, асоба расказвае і пра грахі самаго Дудкіна.
Наколькі прагнілай з’яўляецца беларуская дзяржаўная сістэма, калі МУС і КДБ, якія павінны абараняць закон і дзяржаву, змагаюцца паміж сабой ў ачарненні адно аднога? Прычым для ачарнення выкарыстоўваюць любыя метады. Перамагае той, хто здолее даказаць большую колькасць злачынстваў, здзейсненых супернікам.
Меркаваць аб гэтай прыхаванай вайне мы можам толькі па больш-менш гучных адстаўках і прызначэннях. Усе акалічнасці закуліснай вайны невядомыя нікому.
Каментары