Мінкульт прызнаў гісторыка-культурнай каштоўнасцю каталіцкі абрад «Тры каралі»
Беларуская рэспубліканская навукова-метадычная рада па пытаннях гісторыка-культурнай спадчыны 15 траўня прыняла рашэнне аб неабходнасці надання статусу гісторыка-культурнай каштоўнасці новым аб’ектам спадчыны. Як паведаміў Мінкульт, у спіс сярод іншага ўвайшоў традыцыйны абрад «Тры каралі», які каталіцкія вернікі праводзяць 6 студзеня ў Лідскім раёне.
Абрад калядавання, адроджанага ў Лідскім раёне. Фота: t.me/minkultrb
Гэта абрад калядавання на каталіцкае свята Аб'яўлення Пана (Тры каралі) 6 студзеня. Рэканструкцыю абраду здзейснілі ў 2016-2022 гадах на падставе этнаграфічных звестак супрацоўнікі Дома культуры ў вёсцы Ваверка, піша Katolik.life.
Мясцовыя старажылы — Тарэса Ясюкайціс, Вальдэмар Аксіновіч і Мечыслаў Трусіла — расказалі этнографам, што ў 1960-я гады ў Ваверку прыязджалі калядоўшчыкі з Ліды, якія хадзілі па вёсцы менавіта на Тры каралі, а не напярэдадні Божага Нараджэння. У мясцовай каталіцкай парафіі падтрымалі ідэю адрадзіць абрад і прапанавалі дапамогу міністрантаў, якія ведаюць калядкі.
З 2017 года работнікі Дома культуры і мясцовыя жыхары пачалі штогод праводзіць адноўлены абрад — з гармонікам і каляднымі песнямі хадзіць па вёсцы ў вобразе Трох каралёў — вестуноў, якія прынеслі свае дары нованароджанаму Дзіцятку Езусу.
Пасля Лідскага раёна аналагічны абрад пачалі праводзіць таксама ў Іўеўскім і Воранаўскім. У Міністэрстве культуры аднеслі абрад да катэгорыі «Б», што азначае гiсторыка-культурную каштоўнасць, якая поўнасцю або часткова адноўленая на другасным матэрыяле ці аб’ектыўна з часам можа змяняцца.
Таксама ў спіс дададзеныя руіны касцёла Унебаўзяцця Найсвяцейшай Панны Марыі 1796-1805 гадоў у вёсцы Дубрава Маладзечанскага раёна — з аднясеннем да катэгорыі «3» — гiсторыка-культурная каштоўнасць, якае мае значнасць для асобнага рэгiёна.
Трэцім аб'ектам, які Міністэрства культуры прызнала вартым залічэння да спісу з аднясеннем да той жа катэгорыі «З» — будынак па праспекце Незалежнасці, 27А у Мінску (у межах гістарычнага аб'ёма канца XIX — пачатку XX стагоддзяў).
Каментары