У Манголіі знайшлі парэшткі байца з Беларусі, які загінуў 85 гадоў таму
На месцы баёў каля ракі Халхін-Гол у Манголіі пошукавая экспедыцыя, занятая выяўленнем парэшткаў салдат, знайшла целы 27 байцоў. Сярод іх — Пётр Чарнамордзік з Горацкага раёна, які загінуў у баі ў 1939 годзе, паведамляе «Горацкі веснік».
Раскопкі ў даліне ракі Халхін-Гол, на месцы баёў у 1939 годзе, праводзіліся ў межах Міжнароднай экспедыцыі «Халхін-Гол. Тым большая наша слава. 2024». Удзел у іх прынялі сябры Беларускага геаграфічнага таварыства.
Падчас раскопак яны знайшлі і эксгумавалі парэшткі 27 байцоў, якія загінулі ў бітвах у 1939 годзе. Сярод загінулых у раёне сопкі Рэмезава, паблізу населенага пункта Сумбэр былі знойдзеныя парэшткі загінулага вайскоўца родам з Беларусі.
Як паведамілі ўдзельнікі экспедыцыі, «у байца сярод асабістых рэчаў былі супрацьгаз, рэмень, лыжка, хлорніца, фляга, патроны ў абоймах да вінтоўкі Мосіна, у нагруднай кішэні кашалёк. Баец ляжаў у ненатуральнай позе, з-за чаго было складана вызначыць межы раскопу.
Правёўшы эксгумацыйныя працы, стала зразумела, што баец атрымаў раненне ў галаву, хутчэй за ўсё гэта раненне і стала прычынай гібелі. Пры далейшай рабоце з выяўленымі прадметамі з кашалька былі вынятыя дакументы, якія цудам захаваліся: камсамольскі білет, білет члена Асаавіяхіма, даведка аб здачы нормаў ГТА, распіска, выдадзеная Горацкім райваенкаматам аб канфіскацыі на захоўванне пашпарта. Захавалася нават фатаграфія байца, на якой з далёкага 1939 года на нас глядзіць малады хлопец».
Па ацалелых фрагментах дакументаў было ўстаноўлена, што гэта парэшткі байца па прозвішчы Чарнамордзік, імя прачытаць было нельга, імя па бацьку — Мардухавіч. Ён быў прызваны ў войска Горацкім ваенкаматам у 1938 годзе.
Далейшыя пошукі дазволілі вызначыць поўнае імя байца — Чарнамордзік Пётр Мардухавіч, ён нарадзіўся ў 1918 годзе на тэрыторыі Горацкага раёна Магілёўскай вобласці ў вёсцы Рудкаўшчына.
Цяпер парэшткі Чарнамордзіка будуць пахаваны ў брацкай магіле ва Улан-Батары, а ягоныя дакументы і рэчы перададуць у Горацкі гісторыка-этнаграфічны музей.
У Камянецкім раёне ў полі знайшлі парэшткі расстралянага чалавека
Жахлівая знаходка ў цэнтры Магілёва — пад зямлёй знайшлі тысячы чалавечых костак
У Вільні адкрылася выстава, прысвечаная месцу сталінскіх расстрэлаў пад Оршай. Што адбывалася ў Кабыляках?
У 1959 годзе на Гомельшчыне чацвёртакласнікі пайшлі на суботнік — і амаль увесь клас загінуў. Успамінаем трагедыю
Цяпер чытаюць
Бяспалаў намаляваў людзей са сцягамі ў цэнтры Мінска і адправіў фота ў міліцыю. З’ехаліся тры машыны з мігалкамі14
Каментары