Генпракурор Швед вырашае, ці вярнуць у калонію кіроўцу, які выйшаў на свабоду па амністыі
Бацькі дзіцяці, якога ён насмерць збіў на пешаходным пераходзе, сумняюцца ў тым, што ў кіроўцы ёсць анкалогія, і патрабуюць, каб яго ўсё ж пасадзілі.
У Беларусі можа адбыцца ўнікальная юрыдычная з’ява — чалавека, вызваленага па амністыі, могуць вярнуць за краты. Генеральны пракурор Андрэй Швед будзе разбірацца ў сітуацыі грамадзяніна Віталя Кілесы.
У студзені 2024 года 61-гадовы жыхар Магілёва Віталь Кілеса насмерць збіў 10-гадовага хлопчыка. Той пераходзіў дарогу па пешаходным пераходзе, святлафор не працаваў. Аўтамабілі павінны былі прапусціць хлопчыка, але нармальнага асвятлення не было, кіроўцы не заўважалі яго. Адна машына праехала проста перад ім, а другая збіла насмерць школьніка.
Як высветлілася, кіроўца — той самы Кілеса — перавышаў хуткасць. Ён прызнаў віну, тлумачыў, што не заўважыў хлопчыка. Паколькі Кілеса быў цвярозы, у красавіку 2024 года яму прысудзілі пяць гадоў калоніі-пасялення (калі б быў п'яны, была б звычайная калонія). Таксама жонка Кілесы як уласніца аўтамабіля павінна заплаціць бацькам загінулага хлопчыка кампенсацыю памерам 190 тысяч рублёў.
У жніўні 2024 года бацькі загінулага хлопчыка даведаліся, што Кілеса выйшаў на свабоду па амністыі, хоць правёў за кратамі паўгода. Яны абураныя, што Кілесу адпусцілі так рана. Бацькі хлопчыка сцвярджаюць, што раней у яго двойчы адбіралі правы за п’янае кіраванне, а яшчэ двойчы — за перавышэнне хуткасці. Іх відэазварот шырока разышоўся па тыктоку і сабраў больш за 330 тысяч лайкаў. Апроч таго, бацькі схадзілі на асабісты прыём да генеральнага пракурора Андрэя Шведа.
Ён узяўся за справу і паабяцаў правесці праверку абставін вызвалення Кілесы па амністыі. Як тлумачыцца ў паведамленні пракуратуры, прычынай вызвалення кіроўцы сталі яго праблемы са здароўем — тое, што раней ён праходзіў лячэнне ў сувязі з анкалогіяй.
Цяпер камісія з медыкаў будзе правяраць ягоны дыягназ. Андрэй Швед трымае пытанне на кантролі. Будзе вырашацца, што рабіць з Кілесам — пакідаць на свабодзе ці прызнаваць амністыю незаконнай і вяртаць яго ў калонію-пасяленне.
Цяпер чытаюць
Завадчанін Ігар, які вяртаўся дадому бухім, упершыню ў жыцці едзе за мяжу. А яшчэ ён халасты8
Каментары