Hienprakuror Švied vyrašaje, ci viarnuć u kałoniju kiroŭcu, jaki vyjšaŭ na svabodu pa amnistyi
Baćki dziciaci, jakoha jon naśmierć źbiŭ na piešachodnym pierachodzie, sumniajucca ŭ tym, što ŭ kiroŭcy jość ankałohija, i patrabujuć, kab jaho ŭsio ž pasadzili.
U Biełarusi moža adbycca ŭnikalnaja jurydyčnaja źjava — čałavieka, vyzvalenaha pa amnistyi, mohuć viarnuć za kraty. Hienieralny prakuror Andrej Švied budzie raźbiracca ŭ situacyi hramadzianina Vitala Kilesy.
U studzieni 2024 hoda 61-hadovy žychar Mahilova Vital Kilesa naśmierć źbiŭ 10-hadovaha chłopčyka. Toj pierachodziŭ darohu pa piešachodnym pierachodzie, śviatłafor nie pracavaŭ. Aŭtamabili pavinny byli prapuścić chłopčyka, ale narmalnaha aśviatleńnia nie było, kiroŭcy nie zaŭvažali jaho. Adna mašyna prajechała prosta pierad im, a druhaja źbiła naśmierć školnika.
Jak vyśvietliłasia, kiroŭca — toj samy Kilesa — pieravyšaŭ chutkaść. Jon pryznaŭ vinu, tłumačyŭ, što nie zaŭvažyŭ chłopčyka. Pakolki Kilesa byŭ ćviarozy, u krasaviku 2024 hoda jamu prysudzili piać hadoŭ kałonii-pasialeńnia (kali b byŭ pjany, była b zvyčajnaja kałonija). Taksama žonka Kilesy jak ułaśnica aŭtamabila pavinna zapłacić baćkam zahinułaha chłopčyka kampiensacyju pamieram 190 tysiač rubloŭ.
U žniŭni 2024 hoda baćki zahinułaha chłopčyka daviedalisia, što Kilesa vyjšaŭ na svabodu pa amnistyi, choć pravioŭ za kratami paŭhoda. Jany aburanyja, što Kilesu adpuścili tak rana. Baćki chłopčyka śćviardžajuć, što raniej u jaho dvojčy adbirali pravy za pjanaje kiravańnie, a jašče dvojčy — za pieravyšeńnie chutkaści. Ich videazvarot šyroka razyšoŭsia pa tyktoku i sabraŭ bolš za 330 tysiač łajkaŭ. Aproč taho, baćki schadzili na asabisty pryjom da hienieralnaha prakurora Andreja Švieda.
Jon uziaŭsia za spravu i paabiacaŭ pravieści pravierku abstavin vyzvaleńnia Kilesy pa amnistyi. Jak tłumačycca ŭ paviedamleńni prakuratury, pryčynaj vyzvaleńnia kiroŭcy stali jaho prablemy sa zdaroŭjem — toje, što raniej jon prachodziŭ lačeńnie ŭ suviazi z ankałohijaj.
Ciapier kamisija ź miedykaŭ budzie praviarać jahony dyjahnaz. Andrej Švied trymaje pytańnie na kantroli. Budzie vyrašacca, što rabić z Kilesam — pakidać na svabodzie ci pryznavać amnistyju niezakonnaj i viartać jaho ŭ kałoniju-pasialeńnie.
Śpiavačku Meryjem Hierasimienka na praciahu dvuch hadoŭ źbivaŭ muž43
Śpiavačku Meryjem Hierasimienka na praciahu dvuch hadoŭ źbivaŭ muž
Jak Jadźvihin Š. smažyŭ u redakcyi skvarki i čamu łožak Kupały nahadvaŭ dochłaha viarbluda. Ivulin i Astapienia źniali zachaplalny film pra «Našu Nivu»88
Kamientary