Яшчэ на паўгода працягнулі забарону на ўвоз асобных тавараў праз мяжу з Літвой
Урад Беларусі працягнуў да 1 красавіка 2025 года забарону на ўвоз асобных тавараў праз беларуска-літоўскі ўчастак дзяржаўнай мяжы. Змены ўнесеныя ў пастанову №182, паведаміла прэс-служба Савета Міністраў.
«Гэты крок з'яўляецца вымушанай мерай беларускага боку для забеспячэння абароны нацыянальных інтарэсаў і рэагавання на недружалюбныя дзеянні Літоўскай Рэспублікі», — гаворыцца ў каментарыі прэс-службы.
Забарона на ўвоз асобных тавараў праз беларуска-літоўскі ўчастак дзяржаўнай мяжы паводле пастановы №182 была ўведзеная з 1 красавіка 2024 года. Спачатку яна прадугледжвалася на паўгода, да 1 кастрычніка 2024 года.
Забарона закранае, у прыватнасці, ваду, піва, віны, этанол, воцат, шыны і пакрышкі пнеўматычныя гумовыя, сэканд-хэнд, а таксама ўжываныя часткі і прыналежнасці транспартных сродкаў, прычым незалежна ад краіны іх паходжання.
На фізічных асоб і тавары, якія яны ўвозяць на тэрыторыю Беларусі з Літвы для асабістых патрэб, дзеянне гэтай пастановы не распаўсюджваецца.
Каментары