Былога беларускага палітвязня затрымалі на матчы ў Варшаве за адмову аддаць антылукашэнкаўскі банер
Пасля матчу «Легія» — «Дынама-Мінск» беларус правёў ноч у ізалятары і атрымаў двухгадовую забарону хадзіць на футбол. Фанаты польскага клуба выказалі абурэнне дзеяннямі аховы стадыёна.
Пра гэта паведамляе выданне Most.
Дзмітрый Абрамук кажа, што паход на матч у Варшаве быў для яго спосабам пратэсту супраць рэжыму Лукашэнкі: у Беларусі яго раней асудзілі на два гады зняволення, а ў Варшаве Дзмітрый жыве з 2023 года. Ён узяў з сабой бела-чырвона-белы сцяг і планаваў глядзець гульню разам з сябрам.
— Мы ўзялі білеты на звычайную трыбуну за брамай. На стадыёне да нас падышла дзяўчына і сказала, што беларусам лепш прайсці ў гасцявы сектар. Там ужо сабраліся іншыя хлопцы з БЧБ-сцягамі, — распавядае Дзмітрый.
Беларус не ведаў, што ў гасцявым сектары фанаты запланавалі перформанс, але, убачыўшы банеры з антырэжымнымі лозунгамі, вырашыў падтрымаць суайчыннікаў.
— Я, наогул, думаў, што нічога не будзе. Але беларусы сабраліся і арганізавалі перформанс супраць Лукашэнкі. Вядома, я падтрымаў і не хаваў свой твар. Што ўжо хавацца, мяне і так ведаюць у Беларусі. І як былому палітвязню мне ёсць што сказаць рэжыму.
Затрыманне і ноч у ізалятары
Дзмітрыя затрымалі ў сярэдзіне першага тайма. Сцюарды падышлі да яго і запатрабавалі аддаць банер, які ён трымаў. Беларус адмовіўся і аказаў супраціў.
— У сектары былі фразы з некалькіх банераў, усе яны былі накіраваныя супраць Лукашэнкі і яго міліцыі. Калі да мяне падышлі сцюарды, я не адпускаў банер. Яны пачалі груба яго ў мяне адбіраць. Калі пазабіралі ўсе банеры ў іншых беларусаў, то падышлі да мяне і вывелі.
Забарона на наведванне футбола
Сцюарды перадалі Дзмітрыя паліцыі. Затым яго даставілі ў ізалятар, дзе ён знаходзіўся да суда, які адбыўся на наступны дзень.
— Ноч правёў у ізалятары. Адносіны нармальныя, умовы таксама — лепш, чым у Брэсце, дзе мяне трымалі ў 2021 годзе. Раніцай пакармілі, а ў абед пачаўся суд. Далі нават перакладчыка. Падчас суда я спасылаўся на тое, што не разумеў, што казалі сцюарды. Сапраўды не разумеў, але здагадваўся, што яны хочуць забраць банер. Мне было незразумела, чаму фанатам «Легіі» можна трымаць банеры, а ў нас усё адабралі. Суддзя мне здаўся нармальным, але вырашыў мяне пакараць: даў два гады забароны на матчы ў Польшчы. У абвінавачанні патрабавалі яшчэ штраф у 2 тыс. злотых, але суддзя яго не прызначыў.
Пастанова суду. Дакумент прадстаўлены Дзмітрыем Абрамукам
Дзмітрый — футбольны фанат: у родным Брэсце ён падтрымліваў мясцовае «Дынама», але пасля 2020 года адмовіўся. Пасля эміграцыі ў Варшаву беларус рэгулярна хадзіў на матчы «Легіі» і зборнай Польшчы. Забарона стала для яго нечаканасцю.
— Я люблю футбол і прасіў хаця б 500 злотых штрафу і год забароны, але суддзя не змяніў рашэнне. Вынік гэтай гісторыі для мяне адзіны: цяпер нават у Польшчы я не магу публічна выказацца супраць Лукашэнкі.
«Драма і ганьба»
Фанаты «Легіі» 8 лістапада выпусцілі заяву па выніках матчу. У ёй яны выказалі абурэнне дзеяннямі аховы стадыёна, якая прыбрала некаторыя палітычныя плакаты, вывешаныя беларусамі. Тыя выкарысталі матч, каб выступіць супраць рэжыму Лукашэнкі, а таксама нагадаць пра рэпрэсіі і палітвязняў у Беларусі.
«Ёсць тэмы, якія павінны быць вышэй за падзелы — напрыклад, барацьба за такія фундаментальныя каштоўнасці, як свабода слова, выяўленая гасцямі на стадыёне ў Польшчы, таму што дома за такія транспаранты іх адправілі б у калонію», — напісалі польскія фанаты.
Дзеянні аховы яны назвалі «драмай і ганьбай».
Плакат з жанчынай у чырвона-зялёным з'явіўся на матчы чэмпіянату Беларусі ў Мазыры
Фанаты распавялі, як змаглі арганізаваць перфоманс на матчы ў Варшаве і як змагаліся з п'янымі правакатарамі
«Ты здзейсніла сапраўдны ўчынак». «Дынама» запісала ВІДЭА з падзякай жанчыне ў чырвона-зялёным
Жанчына ў чырвона-зялёным на матчы ў Варшаве: Я нарадзілася, калі быў такі сцяг, і я хачу памерці з ім
Хто тая адзіная жанчына, што прыйшла на матч «Дынама-Мінск» у Варшаве з чырвона-зялёным сцягам
Каментары