Уводзяцца часовыя абмежаванні на праезд велікагрузных аўтамабіляў
Часовыя абмежаванні на праезд велікагрузных аўтамабіляў будуць дзейнічаць на рэспубліканскіх дарогах Беларусі з 20 сакавіка па 20 красавіка.
Як патлумачылі ў прэс‑службе дэпартамента «Белаўтадар» Мінтранса, у вясенні перыяд аўтамабільныя дарогі аказваюцца найбольш безабароннымі перад цяжкімі транспартнымі нагрузкамі. Каб захаваць дарогі і дарожныя збудаванні, а таксама забяспечыць бяспеку руху, і ўводзяцца часовыя абмежаванні нагрузак у межах ад 6 да 9 тон на адзіночную вось аўтамабіля.
У «Белаўтадары» патлумачылі, што пералік дарог з абмежаваннямі дапушчальных нагрузак складзены па выніках дыягностыкі: абмежаванні будуць уведзены на канкрэтных участках дарог у адпаведнасці з іх станам.
Аднак на асноўных маршрутах руху транзітнага транспарту абмежаванні ўводзіцца не будуць.
Гэта дарогі М‑1/Е‑30 Брэст (Казловічы) — Мінск — мяжа Расійскай Федэрацыі (Радзькі), М‑2 Мінск — Нацыянальны аэрапорт Мінск, М‑6 Мінск — Гродна — мяжа Рэспублікі Польшча (Брузгі), М‑7 Мінск — Ашмяны — мяжа Літоўскай Рэспублікі (Каменны Лог), М‑8 Мяжа Расійскай Федэрацыі (Езярышча) — Віцебск — Гомель — мяжа Украіны (Новая Гута) плюс пад’езды да Магілёва і Гомеля, М‑9 Кальцавая дарога вакол Мінска і шэраг іншых транзітных аўтатрас.
Традыцыйна часовыя абмежаванні не будуць распаўсюджвацца на транспартныя сродкі, якія ажыццяўляюць перавозкі пасажыраў, лекавых прэпаратаў, гаруча‑змазачных матэрыялаў, семяннога фонду, жывых жывёл, кветак, пошты і паштовых грузаў, скорапсавальных грузаў і грузаў гуманітарнай дапамогі, а таксама перавозкі, звязаныя з папярэджаннем ці ліквідацыяй надзвычайных сітуацый.
У «Белаўтадары» адзначылі, што без уліку часовых абмежаванняў магчымыя таксама пэўныя віды перавозак (яны агавораны ў пастанове), але пры ўмове атрымання спецыяльнага дазволу на праезд.
На дарогах у адпаведнасці з абмежаваннямі, якія ўводзяцца, устаноўлены часовыя дарожныя знакі, а за перамяшчэннем грузавога транспарту ажыццяўляецца жорсткі кантроль. Згодна з заканадаўствам, перавозчыкі нясуць адказнасць за пашкоджанні дарог, выкліканыя рухам транспарту з парушэннем абмежаванняў.
Як адзначылі ў «Белаўтадары», па меры гатоўнасці аўтадарог да пропуску цяжкавагавых транспартных сродкаў абмежаванні будуць здымацца. «Гэта значыць, магчыма, на шэрагу аўтатрас тэрмін іх дзеяння скароціцца ў залежнасці ад канкрэтнай сітуацыі. У той жа час пры неабходнасці магчымае і дадатковае абмежаванне масы і нагрузак у гэты перыяд», — патлумачылі ў прэс‑службе дэпартамента.
Каментары