Беларус паспрабаваў атрымаць грамадзянства Украіны, бо ягоныя продкі ў 1918 годзе нібыта жылі ва УНР
Грамадзянін Беларусі спрабаваў праз суд ва Украіне пацвердзіць факты жыцця ў 1918 годзе сваіх дзядулі і бабулі на тэрыторыі Украінскай Народнай Рэспублікі і Украінскай Дзяржавы, каб на гэтай падставе атрымаць грамадзянства сучаснай Украіны, заўважыла «Радыё Свабода».
Як стала вядома «Радыё Свабода», у сваёй заяве ў суд беларус паведаміў, што ягоны дзядуля нарадзіўся ў вёсцы Плотніца Пінскага павета (цяпер Столінскі раён Беларусі), а бабуля — у вёсцы Відзібор.
Як вынікала з ліста, падрыхтаванага Інстытутам гісторыі Нацыянальнай акадэміі навук Украіны, населеныя пункты Відзібор і Плотніца Столінскай воласці Пінскага павета сапраўды ўваходзілі ў склад Украінскай Народнай Рэспублікі згодна з Брэсцкай мірнай дамовай і законам аб падзеле Украіны на землі ад 6 сакавіка 1918 года, а ў красавіку-снежні 1918 года — у склад Украінскай Дзяржавы.
У той жа час грамадзянін Беларусі не змог даказаць у судзе, што ягоныя сваякі стала жылі на тэрыторыі гэтых населеных пунктаў, бо, на думку суддзяў, «належных і дапушчальных доказаў сталага пражывання дзядулі і бабулі на тэрыторыі УНР і Украінскай Дзяржавы заяўнік не прадставіў».
Пры гэтым у судовым рашэнні адзначаецца, што суд таксама атрымаў даведку, датаваную 27 студзеня 1966 года, якую выдалі ў Свята-Узнясенскай царкве, што дзядуля заяўніка з 12 жніўня 1946 года да 5 лютага 1955 года працаваў ахоўнікам і прыбіральшчыкам царквы, якая адносілася да Столінскага прыходу Свята-Міхайлаўскай царквы ў вёсцы Відзібор.
У працэсе разгляду заявы суд дапытаў грамадзяніна Беларусі і ягоную маці, але палічыў, што іх паказанні не могуць лічыцца доказамі, паколькі яны абодва не былі сведкамі падзей.
Апеляцыйны суд пацвердзіў рашэнне суда першай інстанцыі аб адмове ў задавальненні заявы.
Згодна з украінскім заканадаўствам, грамадзянін Беларусі можа абскардзіць адмову ў касацыйным парадку.
Украінскае заканадаўства прадугледжвае некалькі падстаў для атрымання іншаземцамі грамадзянства Украіны, у тым ліку жыццё продкаў на тэрыторыі Украінскай Народнай Рэспублікі і Украінскай Дзяржавы, паколькі ў Канстытуцыі краіны вызначана, што Украіна з'яўляецца правапераемніцай УНР, Заходнеўкраінскай Народнай Рэспублікі, Украінскай Дзяржавы і Украінскай Савецкай Сацыялістычнай Рэспублікі.
Згодна з законам аб грамадзянстве, прэтэндэнт павінен даказаць, што ягоныя продкі стала жылі на гэтых тэрыторыях.
Цяпер чытаюць
Рыту Дакоту абвінавацілі, што яна тэрмінова распрадала нерухомасць у Расіі амаль на $2 мільёны. Яна адказала2
Каментары
Никаких таких документов нет, поэтому все гос органы незаконны, как и этот суд ))