Лукашэнка абмеркаваў з Рыжанковым «крокі па аднаўленні даверу з заходнімі краінамі»
Гэтая заява прагучала на фоне запланаванай тэлефоннай размовы прэзідэнтаў ЗША і Расіі.
Аляксандр Лукашэнка 18 сакавіка абмеркаваў з міністрам замежных спраў Максімам Рыжанковым крокі па аднаўленні даверу ў адносінах з партнёрамі, у тым ліку з шэрагам заходніх дзяржаў. Пра гэта кіраўнік замежнапалітычнага ведамства расказаў журналістам па выніках рабочай сустрэчы з Лукашэнкам, піша БелТА.
Аляксандр Лукашэнка ва ўступным слове акрэсліў шэраг пытанняў для абмеркавання. Гэта прапрацоўка візітаў, рэалізацыя планаў па развіцці супрацоўніцтва, у тым ліку з Кітаем. Сярод тэм таксама праца на пляцоўцы Еўразійскага эканамічнага саюза і падрыхтоўка да правядзення саміту з улікам старшынства Беларусі ў гэтым інтэграцыйным аб’яднанні ў бягучым годзе. Акрамя таго, ён плануе правесці нараду з беларускімі пасламі.
«Таксама быў абмеркаваны шэраг пытанняў, звязаных з рэалізацыяй пэўных нашых крокаў і крокаў нашых партнёраў па аднаўленні даверу ў адносінах. Гэта датычыла, у тым ліку, і шэрагу заходніх дзяржаў», — адзначыў Максім Рыжанкоў.
Якія менавіта пытанні абмяркоўваліся ў гэтым кантэксце, міністр не ўдакладніў. Аднак яшчэ ў канцы мінулага года Лукашэнка, напрыклад, расказваў пра просьбы ЗША пашырыць дыпламатычную прысутнасць у Беларусі.
Адносіны Мінска з заходнімі суседзямі, Еўрасаюзам і ЗША пагоршалі ў 2021—2022 гадах.
Спачатку ў Беларусі пачаліся масавыя рэпрэсіі, у выніку якіх некалькі соцень тысяч беларусаў вымушаныя былі шукаць прытулку ў суседніх краінах. Адначасова з гэтым разгарнулася кампаніі ачарнення Захаду і распальвання варожасці да суседніх краін. У маі 2021 года Мінск прымусова пасадзіў самалёт авіякампаніі «Раянэйр», што Польшча і Літва назвалі актам паветранага пірацтва. Пры канцы 2021 года з беларускай тэрыторыі пачаліся арганізаваныя атакі мігрантаў на суседнія краіны, якія суправаджаліся прапагандысцкімі спецаперацыямі. Нарэшце, саўдзел Беларусі ў нападзе на Украіну ў лютым 2022 года прывёў адносіны з суседзямі да пункту замярзання.
Сустрэча Лукашэнкі з Рыжанковым адбылася пасля вяртання першага з Масквы, дзе ён сустракаўся з Уладзімірам Пуціным і на фоне вычарпання Расіяй магчымасцей наступу ва Украіне, дзе вайна зайшла ў тупік. Звяртае ўвагу, што заява аб «кроках па аднаўленні даверу з заходнімі краінамі» прагучала ў дзень, калі мае адбыцца тэлефонная размова прэзідэнтаў ЗША і Расіі, падчас якой, як можна чакаць, Масква пагодзіцца на прапанову Украіны і ЗША аб прыпыненні агню на 30 дзён.
«Арабскі шэйх засунуў даляры ў кішэню». Блогер Vadimati Ермашук цяпер працуе ахоўнікам люксавых буцікоў3
Каментары