Без Караткевіча і Шагала. У віцебскім лялечным тэатры зніклі з афішы многія спектаклі — у чым прычына?
У рэпертуары віцебскага тэатра «Лялька» амаль не засталося спектакляў для дарослых. Раней тут гралі і «Ладдзю роспачы» па Караткевічу, і пастаноўку пра Марка Шагала «Мастак. Вяртанне ў Віцебск». Цяпер адзіная прапанова ў афішы для гледачоў 16+ —тэатральна-канцэртная праграма «Калейдаскоп (не)звычайных гісторый». У астатнім жа рэпертуар складаюць такія казкі для самых маленькіх, як «Калабок» ці «Пятрушка» (апошні ўвогуле лічыцца персанажам рускага народнага лялечнага тэатра). З чым звязаныя такія перамены?
У адміністрацыі тэатра, куды журналіст «Нашай Нівы» дазваніўся ў якасці сталага гледача, паведамілі, што афішнае збядненне звязанае са звальненнямі акцёраў:
«Акцёры пайшлі, а маладняк навучыць яшчэ трэба, увесці ў рэпертуар. У нас жа былі занятыя і ўзроставыя акцёры: нехта перайшоў на новую пасаду, а іншым ужо складана ў свае 60+ скакаць у «Брэменскіх музыках» гэтак жа, як раней».
Год таму з тэатра быў звольнены колішні мастацкі кіраўнік Віктар Клімчук, які працаваў там з моманту стварэння «Лялькі». Менавіта з яго асобай і звязваюць найбольш прарыўныя і цікавыя пастаноўкі ў рэпертуары. Падчас яго працы калектыў тэатра быў неаднаразова адзначаны дыпломамі на прэстыжных міжнародных фестывалях. Пры гэтым звольнілі Клімчука нібыта за невыкананне планаў, за якія звычайна адказвае дырэктар, а не мастацкі кіраўнік.
Тое, што ўласная рэпертуарная разнастайнасць паменшала, у адміністрацыі звязваюць і з грашовымі складанасцямі, выкліканымі новым указам Лукашэнкі, які набыў моц з пачатку гэтага года. Згодна з ім тэатры сталі атрымліваць менш бюджэтных грошай — іх перавялі на роўнадолевае фінансаванне расходаў. Цяпер стварэнне новых пастановак, гастролі, аплата камунальных паслуг і эксплуатацыйных выдаткаў, а таксама выплата заробкаў ажыццяўляецца 50 на 50 — са сродкаў бюджэту і ўласных прыбыткаў тэатраў.
«Нам трэба больш зарабляць, таму застаецца менш часу на рэпетыцыі чагосьці новага, мусім больш выступаць», — патлумачылі ў адміністрацыі віцебскага тэатра «Лялька».
У сувязі з гэтым навінак у тэатры ці аднаўлення старога рэпертуару бліжэйшым часам не прадбачыцца.
«Мы больш нічога не пацягнем. Мабыць, праз нейкі час. І старыя пастаноўкі мы не спісваем, магчыма, яны таксама недзе нейкім чынам ажывуць».
Пакуль у тэатры заклікаюць гледачоў падтрымаць іх «сваёй прысутнасцю» на актуальных спектаклях.
Варта адзначыць, што тэатр «Лялька» разам з Купалаўскім, Коласаўскім і РТБД застаецца адным з нешматлікіх тэатраў, дзе ўсе ўласныя спектаклі робяцца па-беларуску.
Цяпер чытаюць
Памятаеце немаладога актывіста, які па дурасці зняўся ў прапагандысцкім кіно БТ? У Польшчы ён уляпаўся яшчэ і ў шпіянаж5
Каментары