Два старэйшыя сыны Аляксандра Лукашэнкі ўжо шмат гадоў працаўладкаваныя ў розных дзяржаўных установах. Амаль 20 гадоў Дзмітрый Лукашэнка ўзначальвае Прэзідэнцкі спартыўны клуб. Ягоны брат Віктар Лукашэнка доўгі час працаваў у Радзе бяспекі Беларусі, а з 2021 года ён — старшыня Нацыянальнага Алімпійскага камітэта Беларусі, піша «Бюро».
Якая ж налічаная зарплата братоў на іх пасадах, з якой выплачваліся падаткі і ўнёскі? У Беларусі чыноўнікі, дэпутаты і дзяржслужбоўцы не публікуюць свае дэкларацыі пра даходы. Але журналісты «Бюро» змаглі даведацца, колькі Віктар і Дзмітрый Лукашэнкі атрымалі брута на сваіх пасадах у 2023 і 2024 гадах.
У Віктара Лукашэнкі на пасадзе старшыні НАК Беларусі заработная плата бруднымі за 2023 год склала 112 341 рубель. А за дзевяць месяцаў 2024 года — каля 97 тысяч рублёў.
Ягоны брат Дзмітрый Лукашэнка з ліпеня 2005 года ўзначальвае Прэзідэнцкі спартыўны клуб. За 2023 год яго заработная плата бруднымі была 112 341 рубель (прыкладна 9 361 у месяц). За дзевяць месяцаў 2024 года — каля 99 тысяч рублёў.
У 2023 годзе зарплаты брута ў братоў былі абсалютна ідэнтычныя — капейка ў капейку. Але ў 2024 годзе ў Віктара ліпеньская зарплата атрымалася меншай, чым у Дзмітрыя. За выключэннем гэтага выпадку, у абодвух братоў аднолькавыя сумы мінімум апошнія два гады. Гэта каб нікому крыўдна не было?
Што да іхнага бацькі, Аляксандра Лукашэнкі, то пра ягоную зарплату беларусы даведваюцца прыкладна раз на пяць гадоў, калі ЦВК публікуе дэкларацыі пра даходы і маёмасць усіх кандыдатаў.
Даход Аляксандра Лукашэнкі за 2023 год склаў 203 590 рублёў (прыкладна 16 965 у месяц), што па сярэднім курсе на той год было эквівалентным прыкладна 67 тысячам даляраў. Увесь ягоны даход — гэта зарплата на пасадзе «прэзідэнта». Падчас кампаніі 2020 года ён задэклараваў даход за 2019 год у 117 тысяч рублёў. То бок за чатыры гады ягоны даход у рублях вырас амаль удвая.
Каментары
Абельская и Лукашенко получают в казне столько же, сколько три сына Лукашенко.