Ціханоўская: Расійская апазіцыя павінна дыстанцыявацца ад імперыялістычнага наратыву
У размове з галандскім выданнем RAAM Святлана Ціханоўская разважала пра тэндэнцыю збліжэння ЗША і Расіі, ролю Лукашэнкі ў гэтым кантэксце, праблематычныя моманты ў расійскай апазіцыі і тое, што матывуе беларусаў працягваць змаганне.
Вось некалькі заяваў з размовы:
Раз’яднанне ЕС і ЗША — зброя для Лукашэнкі
«НАТА — важны інструмент у барацьбе з дыктатурамі. Дыктатуры не любяць нічога больш за прынцып «падзяляй і пануй». Як толькі яны бачаць рознагалоссі, то імкнуцца імі скарыстацца. Лукашэнка таксама спрабуе гуляць на гэтым — ён робіць гэта ўжо больш за 30 гадоў. Яго цікавіць толькі выжыванне ўласнага рэжыму».
Пагроза для Еўропы ад вучэнняў «Захад-2025»
«Мяне трывожаць гэтыя вучэнні. З іх дапамогай Расія хоча націснуць на НАТА, падаць палітычны сігнал. Гэта яшчэ раз даказвае: Беларусь і стабільнасць у Еўропе нельга разглядаць асобна. Без Беларусі Расія не зможа захапіць Украіну ці напасці на краіны Балтыі. І менавіта гэта мы спрабуем данесці да нашых партнёраў на Захадзе».
Што працягвае натхняць у цяжкія хвіліны?
«Я не маю маральнага права сказаць: «Я спыняюся», бо ў нас больш за тысячу палітвязняў, якія ахвяравалі сваёй свабодай. Вядома, бываюць моманты, калі я адчуваю расчараванне. Але адзінства беларусаў працягвае мяне натхняць. Мы так шмат дасягнулі! Шмат хто на Захадзе больш не лічыць нас прыдаткам Расіі, мы нават вядзём стратэгічны дыялог з Злучанымі Штатамі, Канадай і Вялікабрытаніяй. Шмат краінаў адмаўляюцца прызнаваць Лукашэнку. Гэта ўжо перамога».
Імперыялістычны наратыў у расійскай апазіцыі
«Кантакты з расійскай апазіцыяй ёсць, але яны не з'яўляюцца структурнымі. Мы пераследуем адны і тыя ж мэты, і я думаю, што большасць чальцоў расійскай апазіцыі выступаюць супраць вайны ва Украіне. Мы хочам, каб расійскія апазіцыйныя сілы дыстанцыяваліся ад імперыялістычнага расійскага наратыву і шанавалі сваіх суседзяў».
Цяпер чытаюць
У Польшчы арыштавалі былога кіраўніка беларускага «Паспалітага рушэння» — пагражае 10 год за наркотыкі16
Каментары