У Грузіі затрымалі беларуса, які прыйшоў падаць заяву на прытулак
Грамадзяніна Беларусі затрымалі 14 ліпеня на выхадзе з Дэпартамента міграцыі МУС Грузіі, паведаміў выданню «Позірк» праваабаронца Раман Кісляк, які жыве ў гэтай краіне.
«Цэлы дзень стаялі на спякоце, каб падаць заяву (у Тбілісі цяпер да 37 градусаў вышэй за нуль. — «Позірк».). Цень — вузкая паласа ўздоўж плота, месца па паху нібыта грамадскі туалет. У 16.35 (15.35 паводле мінскага часу. — «Позірк».) усё ж такі чарга падышла, і ён зайшоў. Загадзя падрыхтаваную заяву прынялі. Праз некаторы час заяву вярнулі назад і сказалі, што сёння не паспеюць яго прыняць, хай прыходзіць заўтра. На выхадзе яго затрымалі», — сказаў Кісляк.
Паводле яго слоў, малады чалавек не абнуліў кароткачасовым выездам тэрмін знаходжання ў Грузіі — не больш за 365 дзён запар, у яго быў пратэрмінаваны пашпарт, які праз указ Аляксандра Лукашэнкі ад 4 верасня 2023 года нельга замяніць па-за межамі Беларусі.
«Але форму абыходжання з грамадзянінам расцэньваю як адмову ў прыняцці заявы на прытулак і адвольнае затрыманне», — падкрэсліў праваабаронца.
Вядома, што грузінскія ўлады адхіляюць усе заявы беларусаў аб наданні прытулку. Сам Кісляк 11 ліпеня атрымаў канчатковую адмову ў прытулку, прайшоўшы за некалькі гадоў усе мясцовыя інстанцыі. Цягам 30 дзён ён абавязаны пакінуць Грузію.
Кісляк мае намер абскардзіць рашэнне мясцовых уладаў у структурах ААН.
У Грузіі цяпер пражывае каля 12 тыс. беларусаў, якія эмігравалі з-за пагрозы рэпрэсій. Іх колькасць паступова памяншаецца.
Грузія канчаткова адмовіла праваабаронцу Кісляку ў прытулку
«Гэта не самы прывабны варыянт». Што думаюць беларусы пра ўвядзенне Грузіяй трохгадовага ДНЖ для айцішнікаў
Грузія не пусціла назад яшчэ аднаго актывіста тамтэйшай беларускай дыяспары
Праз палітыку ўладаў беларусы пакідаюць Грузію, прадаюць кватэры
У Грузіі хочуць афіцыйна ўскладніць атрыманне прытулку іншаземцамі
Каментары