Сусветная зорка Джэйсан Дэрула заехаў у Беларусь. Прэм’ер Турчын вадзіў яго па Доме ўрада
У амерыканскага спевака Джэйсана Дэрула — аграмадная аўдыторыя. У інстаграме і ютубе ён мае па 40 мільёнаў падпісчыкаў. Сёння ў тэлеграм-канале беларускага ўрада з'явілася відэа, што ён прыехаў у Беларусь і сам прэм'ер-міністр Аляксандр Турчын праводзіць яму экскурсію па Доме ўрада.
Вітаючы незвычайнага госця, Турчын адзначыў поспехі ў музычнай кар’еры артыста і ўражвальную колькасць плацінавых дыскаў.
«Так, на працягу апошніх 16 гадоў я будаваў сваю музычную кар’еру», — пацвердзіў Джэйсан Дэрула і падзякаваў за магчымасць гэтай сустрэчы, якая для яго, маўляў, вялікі гонар.
Аляксандр Турчын запрасіў госця ў залу, дзе адбываюцца сустрэчы з міжнароднымі дэлегацыямі. Ён пацікавіўся, якое ўражанне на музыканта зрабіў Мінск.
«Я б хацеў зрабіць гэтае месца сваім домам», — з усмешкай адказаў артыст.
«Мне вельмі падабаюцца людзі тут. Усе ставяцца вельмі паважліва. Калі я гуляў па горадзе, усе ветліва падыходзілі, прасілі зрабіць фота. Вельмі прыемнае ўражанне ад людзей. Ежа вельмі смачная: усё, што я тут спрабаваў, вельмі спадабалася», — дадаў ён.
Дэрула запэўніў, што гэта не апошні ягоны візіт у Беларусь, у якую ён прыехаў з чатырохгадовым сынам.
«Калі вы вырашыце набыць дом — мы гатовыя дапамагчы», — падкрэсліў Аляксандр Турчын.
Музыкант таксама выказаў жаданне падзяліцца сваёй творчасцю з беларусамі. Аляксандр Турчын і Джэйсан Дэрула абмеркавалі магчымасць арганізацыі канцэрта ў канцы верасня.
Джэйсан Дэрула — амерыканскі спявак, аўтар песень, акцёр, музыкант і танцор. За час сваёй кар’еры артыст здабыў папулярнасць у ЗША, а таксама ў краінах Амерыкі і Еўропы.
Раней паведамлялася, што спявак Джэйсан Дэрула 26 і 28 верасня выступіць з канцэртамі ў Маскве і Санкт-Пецярбургу.
Каментары