Ціханоўскі расказаў, што плануе рабіць падчас візіту ў ЗША і чым яму дапамог Пракоп'еў
У кулуарах канферэнцыі «Новая Беларусь» у Варшаве Сяргей Ціханоўскі расказаў падрабязнасці пра свой запланаваны візіт у ЗША.
Сяргей Ціханоўскі ў каментары «Нашай Ніве» адзначыў, што падчас свайго візіту ў ЗША, які запланаваны на верасень, плануе сустракацца і з мясцовымі палітыкамі, і з беларускай дыяспарай.
«Яшчэ адзін кірунак, які прапанавала наша дыяспара, гэта выступленні ва ўніверсітэтах ЗША. У іх прынята, калі ўніверсітэт запрашае, то ён аплачвае пералёт, гатэль і нейкі ганарар. Гэта часткова можа быць нашым рашэннем праблем з лагістыкай», — сказаў ён.
Разам з камандай — яго памочнікам і аператарам — Ціханоўскі заедзе як мінімум у Нью-Ёрк, Вашынгтон, Філадэльфію, Маямі і Чыкага. Таксама яны наведаюць Канаду.
Візіт у Паўночную Амерыку будзе доўжыцца каля месяца і можа скончыцца ў кастрычніку, але падрабязнасцяў пакуль няма.
У ЗША Ціханоўскі пабачыцца з грамадскім дзеячам і былым мінскім рэстаратарам Вадзімам Пракоп'евым. Той «дапамог трошкі з білетамі ў ЗША, сваімі фінансамі».
«Ён хоча трошкі мяне падрыхтаваць, правесці лікбез — тыднёвы трэнінг па амерыканскай палітыцы, унутранай і знешняй. Расказаць сваё меркаванне, як трэба рухацца», — дадаў Ціханоўскі.
Блогер кажа, што яго асноўная мэта візіту ў ЗША — вызваленне палітзняволеных.
«У мяне ёсць свае ідэі, якія ніяк не звязаныя з Пракоп'евым. І я хачу гэтыя ідэі данесці да адміністрацыі Трампа. Хачу падзякаваць Дональду Трампу за сваё вызваленне», — адзначыў Ціханоўскі.
Свае ідэі Ціханоўскі пакуль не раскрывае.
Цяпер чытаюць
Памятаеце Асоль Слівец? Жыццё фрыстайлісткі змянілася да непазнавальнасці, цяпер яна Абігаль1
Каментары