Кампанія Stadler адмовілася паставіць цягнікі Беларускай чыгунцы
У швейцарскай кампаніі Stadler абверглі падпісанне кантракта з БЧ, хоць перамовы паміж імі сапраўды былі. Пра гэта ў пісьмовым каментарыі выданню Office Life паведаміў прадстаўнік Stadler.
У канцы гэтага тыдня ў СМІ з’явілася інфармацыя пра пастаўку Stadler цягнікоў міжрэгіянальных ліній. Гаварылася, што для БЧ павінны паставіць 65 цягнікоў, у тым ліку 30 электрацягнікоў і 35 дызель-цягнікоў.
Пасля ўвядзення санкцый у 2022 годзе на заводзе «Штадлер Мінск» у Фаніпалі спынілі вытворчасць саставаў. Пры гэтым швейцарская кампанія працягвае заставацца 100%-м уласнікам завода ў Беларусі і падтрымлівае яго, каб аднавіць працу, як толькі санкцыі будуць зняты.
У каментарыі Office Life прадстаўнік кампаніі падкрэсліў, што «Stadler цалкам выконвае санкцыі, уведзеныя ў дачыненні да Беларусі. У выніку санкцый Stadler скараціў вытворчасць на сваім заводзе ў Мінску да мінімуму».
Таксама ў кампаніі пацвердзілі, што перамовы з БЧ адбыліся, але «БЧ і Stadler не падпісалі кантракт».
«Stadler усведамляе, што ў цяперашніх умовах ні пастаўка цягнікоў у Беларусь, ні вытворчасць цягнікоў у Беларусі не дапускаюцца», — гаворыцца ў каментарыі.
У верасні мінулага года ўрад Беларусі паведамляў, што на завод «Штадлер Мінск» могуць прыйсці інвестары з Расіі, аднак пакуль пра канкрэтныя крокі ў гэтым напрамку нічога не вядома.
Stadler працуе на беларускім рынку з 2014 года.
Рэпрэсіі разганяюцца ці запавольваюцца? Давайце лічыць9
Каментары