Кожны шосты нафтавы танкер у свеце належыць да расійскага «ценявога флоту»
На пачатку 2025 года гэты «ценявы флот» налічваў каля 940 суднаў.
Расія змагла абысці заходнія санкцыі, стварыўшы «ценявы флот» нафтавых танкераў. Паводле ацэнак, каля 17% ад усіх дзеючых суднаў такога класа выкарыстоўваецца для перавозкі расійскай нафты, піша «Украінская праўда» са спасылкай на The New York Times.
Пасля пачатку поўнамаштабнага ўварвання Расіі ва Украіну ў 2022 годзе Захад увёў шэраг санкцый, скіраваных на абмежаванне прыбыткаў Крамля ад экспарту нафты. Аднак РФ хутка наладзіла новую схему заробку: яна сабрала флот старых суднаў з непразрыстай структурай уласнасці, якія тайна дастаўляюць нафту ў Кітай, Індыю і іншыя аддаленыя рынкі.
Паводле падлікаў S&P Global Market Intelligence, на пачатку 2025 года гэты «ценявы флот» налічваў каля 940 суднаў — на 45% больш, чым годам раней. Яго доля складае прыблізна 17% ад усяго сусветнага танкернага флоту.
Шмат якія з гэтых суднаў працуюць без належнага страхавання, часта змяняюць сцягі, падаюць ілжывыя даныя пра месцазнаходжанне і ажыццяўляюць перагрузку нафты ў моры. Гэта ўскладняе адсочванне паходжання нафты і кантроль за выкананнем санкцый.
Паводле дадзеных S&P, сярэдні ўзрост суднаў складае каля 20 гадоў, у параўнанні з 13 гадамі для нафтавага флоту ў цэлым.
«Адсутнасць страхавання ў спалучэнні з вельмі старымі суднамі павялічвае рызыку экалагічнай катастрофы», — сказала Наталля Гозак, дырэктар офіса Greenpeace Украіна.
Акрамя таго, некаторыя з гэтых суднаў падазраюцца ў падводным сабатажы — пашкоджанні трубаправодаў або кабеляў.
«Шмат хто хоча зрабіць найпрасцейшую частку — увесці санкцыі. Але насамрэч мы стварылі яшчэ большую праблему. Санкцыі не выводзяць іх з бізнесу. Яны выводзяць іх з легальнага бізнесу», — падкрэсліў эксперт па марской бяспецы і заснавальнік даследчай фірмы I.R. Consilium Ян Ралбі.
Каментары