Людміла Няронская перапісала сваю кампанію ў Польшчы на давераную асобу. Да лютага 2023 года Людміла Няронская сумесна валодала кампаніяй у Польшчы — Transexpedition Polska, піша «Бюро».
Кампанія займалася лагістыкай, пастаўкамі звадкаванага вуглевадароднага газу (LPG) і чыгуначнай экспедыцыяй. У 2021 годзе фірма таксама выконвала перавалку сыпучай хіміі для Sibur International GmbH — актыву, шчыльна звязанага з сям’ёй Уладзіміра Пуціна. У фінансавых дакументах Transexpedition Polska пазначае, што яе асноўныя бізнэс-інтарэсы размешчаныя ва «ўсходніх суседзяў» — у Расіі, Беларусі, Украіне.
Transexpedition Polska была заснаваная ў 2019 годзе беларускім бізнэсоўцам Артурам Зубарыкам (50%) і набліжанай да сям’і Лукашэнкі бізнэсоўкай Людмілай Няронскай (50%). Узначаліла польскі актыў беларускіх бізнэсоўцаў іх суайчынніца Ганна Машэра. Да гэтага прызначэння яна працавала ў беларускай кампаніі Няронскай «Захадтрансэкспедыцыя».
Журналісты высветлілі, што Ганна Машэра не проста супрацоўніца структур Няронскай, а сяброўка сям’і і блізкі чалавек. У яе інстаграм-акаўнце яны знайшлі ўзаемныя падпіскі з самой Людмілай Няронскай, маці Няронскай Клаўдзіяй Мінаковай і дзецьмі пары Няронскіх. Дочкі Няронскай і Машэры разам адпачывалі ў Італіі.
Людміла Няронская даўно звязаная з сям’ёй Віктара Лукашэнкі. Дзеці Няронскай і Лукашэнкі вучыліся разам у прэстыжнай мінскай гімназіі № 16. Дарэчы, там жа Няронская і Лілія Лукашэнка былі разам у папячыцельскім савеце. У 2019 годзе Няронская з жонкай і дзецьмі Віктара Лукашэнкі лётала на прыватным бізнэс-джэце з Мінска ў Дубай. На шляху назад да іх далучыўся і сам Віктар.
Не так даўно «Бюро» расказвала пра тое, што Людміла Няронская пачала сумесны бізнэс з сынам Віктара Лукашэнкі Аляксандрам Лукашэнкам — малодшым.
Пасля пачатку поўнамаштабнага ўварвання Расіі ва Украіну і ўвядзення санкцый Transexpedition Polska стала мяняць свой профіль дзейнасці, займаючыся не толькі пастаўкамі звадкаванага газу, але і перавозкай інгібітараў, аўтамабіляў, рапсу, збожжавых і іншых тавараў. Паводле інфармацыі «Бюро», кампанія ў 2023 і 2024 гадах пастаўляла ў Расію грузавыя машыны (Mercedes-Benz, Volkswagen, IVECO) з Германіі.
Да ўварвання польскі актыў Людмілы Няронскай прыносіў неблагі прыбытак сваім уладальнікам. За 2021 год фірма атрымала чыстага прыбытку 7 мільёнаў злотых (1,6 млн еўра), у 2022 годзе — каля 5 мільёнаў злотых (1,1 млн еўра). Але апошнія два гада — 2023‑ці і 2024‑ты — кампанія стабільна ідзе ў мінус па выніках года.
Продаж расійскай дачкі
З-за санкцый Transexpedition Polska давялося пазбавіцца ад долі ў расійскай кампаніі. З 2021 года яна валодала 99,9% долі ў фірме «Грузавая служба», зарэгістраванай у Смаленску. Але пасля пачатку ўварвання польская кампанія прадала яе Людміле Няронскай і Артуру Зубарыку, то бок уласным уладальнікам. Кошт угоды — 20,9 мільёна злотых, або 4,4 мільёна еўра.
27 студзеня 2023 года, за некалькі дзён да гэтай угоды ў польскай кампаніі, пазачарговы сход акцыянераў вырашыў выплаціць 8,2 мільёна злотых (1,7 мільёна еўра) дывідэндаў Няронскай і Зубарыку з прыбытку за 2019 — 2021 гады.
Ужо 2 лютага 2023 года дырэктарка Transexpedition Polska Ганна Машэра стала адзінай уладальніцай кампаніі. Дамоўленасці з былымі ўладальнікамі былі такія: спачатку яны заплацяць за купленую імі расійскую дачку, а потым атрымаюць дывідэнды ад польскай кампаніі.
Але мяркуючы па справаздачах Transexpedition Polska на 2024 год, у Зубарыка і Няронскай заставаўся доўг за расійскую кампанію ў памеры 7,98 мільёна злотых (1,8 мільёна еўра).
Па выніку ў 2024 годзе адбыўся ўзаемазалік. Польская кампанія залічыла частку доўгу за продаж былой расійскай дачкі ў кошт дывідэндаў, якія павінна Зубарыку і Няронскай.
Кампанія залічыла 5 мільёнаў злотых доўгу за расійскую кампанію за такую ж частку дывідэнднага доўгу і спісала 2 мільёны злотых сабе на страту. І засталася вінная яшчэ 2,98 мільёна злотых дывідэндаў Зубарыку і Няронскай.
Пры гэтым нягледзячы на продаж кампаніі, Transexpedition Polska дагэтуль застаецца як «партнёр» на сайце групы кампаній «Сыравінныя рэсурсы-бел», якая належыць Людміле Няронскай і Артуру Зубарыку.
Цяперашняя ж уладальніца Transexpedition Polska Ганна Машэра працягвае развіваць бізнэс у Польшчы. У чэрвені 2025 года яна зарэгістравала новую фірму ў Беластоку — Krafttrade. Кампанія плануе займацца экспедыцыяй, лагістыкай і неспецыялізаваным гуртовым гандлем.
Цяпер чытаюць
Мастакоў Рымашэўскага і Шчамялёву пратрымалі амаль год у СІЗА, але далі такі тэрмін, каб у судзе адпусціць дадому2
Каментары