Ludmiła Niaronskaja pierapisała svaju kampaniju ŭ Polščy na davieranuju asobu. Da lutaha 2023 hoda Ludmiła Niaronskaja sumiesna vałodała kampanijaj u Polščy — Transexpedition Polska, piša «Biuro».
Kampanija zajmałasia łahistykaj, pastaŭkami zvadkavanaha vuhlevadarodnaha hazu (LPG) i čyhunačnaj ekśpiedycyjaj. U 2021 hodzie firma taksama vykonvała pieravałku sypučaj chimii dla Sibur International GmbH — aktyvu, ščylna źviazanaha ź siamjoj Uładzimira Pucina. U finansavych dakumientach Transexpedition Polska paznačaje, što jaje asnoŭnyja biznes-intaresy raźmieščanyja va «ŭschodnich susiedziaŭ» — u Rasii, Biełarusi, Ukrainie.
Transexpedition Polska była zasnavanaja ŭ 2019 hodzie biełaruskim biznesoŭcam Arturam Zubarykam (50%) i nabližanaj da siamji Łukašenki biznesoŭkaj Ludmiłaj Niaronskaj (50%). Uznačaliła polski aktyŭ biełaruskich biznesoŭcaŭ ich suajčyńnica Hanna Mašera. Da hetaha pryznačeńnia jana pracavała ŭ biełaruskaj kampanii Niaronskaj «Zachadtransekśpiedycyja».
Žurnalisty vyśvietlili, što Hanna Mašera nie prosta supracoŭnica struktur Niaronskaj, a siabroŭka siamji i blizki čałaviek. U jaje instahram-akaŭncie jany znajšli ŭzajemnyja padpiski z samoj Ludmiłaj Niaronskaj, maci Niaronskaj Kłaŭdzijaj Minakovaj i dziećmi pary Niaronskich. Dočki Niaronskaj i Mašery razam adpačyvali ŭ Italii.
Ludmiła Niaronskaja daŭno źviazanaja ź siamjoj Viktara Łukašenki. Dzieci Niaronskaj i Łukašenki vučylisia razam u prestyžnaj minskaj himnazii № 16. Darečy, tam ža Niaronskaja i Lilija Łukašenka byli razam u papiačycielskim saviecie. U 2019 hodzie Niaronskaja z žonkaj i dziećmi Viktara Łukašenki lotała na pryvatnym biznes-džecie ź Minska ŭ Dubaj. Na šlachu nazad da ich dałučyŭsia i sam Viktar.
Nie tak daŭno «Biuro» raskazvała pra toje, što Ludmiła Niaronskaja pačała sumiesny biznes z synam Viktara Łukašenki Alaksandram Łukašenkam — małodšym.
Paśla pačatku poŭnamaštabnaha ŭvarvańnia Rasii va Ukrainu i ŭviadzieńnia sankcyj Transexpedition Polska stała mianiać svoj profil dziejnaści, zajmajučysia nie tolki pastaŭkami zvadkavanaha hazu, ale i pieravozkaj inhibitaraŭ, aŭtamabilaŭ, rapsu, zbožžavych i inšych tavaraŭ. Pavodle infarmacyi «Biuro», kampanija ŭ 2023 i 2024 hadach pastaŭlała ŭ Rasiju hruzavyja mašyny (Mercedes-Benz, Volkswagen, IVECO) z Hiermanii.
Da ŭvarvańnia polski aktyŭ Ludmiły Niaronskaj prynosiŭ niebłahi prybytak svaim uładalnikam. Za 2021 hod firma atrymała čystaha prybytku 7 miljonaŭ złotych (1,6 młn jeŭra), u 2022 hodzie — kala 5 miljonaŭ złotych (1,1 młn jeŭra). Ale apošnija dva hada — 2023‑ci i 2024‑ty — kampanija stabilna idzie ŭ minus pa vynikach hoda.
Prodaž rasijskaj dački
Z-za sankcyj Transexpedition Polska daviałosia pazbavicca ad doli ŭ rasijskaj kampanii. Z 2021 hoda jana vałodała 99,9% doli ŭ firmie «Hruzavaja słužba», zarehistravanaj u Smalensku. Ale paśla pačatku ŭvarvańnia polskaja kampanija pradała jaje Ludmile Niaronskaj i Arturu Zubaryku, to bok ułasnym uładalnikam. Košt uhody — 20,9 miljona złotych, abo 4,4 miljona jeŭra.
27 studzienia 2023 hoda, za niekalki dzion da hetaj uhody ŭ polskaj kampanii, pazačarhovy schod akcyjanieraŭ vyrašyŭ vypłacić 8,2 miljona złotych (1,7 miljona jeŭra) dyvidendaŭ Niaronskaj i Zubaryku z prybytku za 2019 — 2021 hady.
Užo 2 lutaha 2023 hoda dyrektarka Transexpedition Polska Hanna Mašera stała adzinaj uładalnicaj kampanii. Damoŭlenaści z byłymi ŭładalnikami byli takija: spačatku jany zapłaciać za kuplenuju imi rasijskuju dačku, a potym atrymajuć dyvidendy ad polskaj kampanii.
Ale miarkujučy pa spravazdačach Transexpedition Polska na 2024 hod, u Zubaryka i Niaronskaj zastavaŭsia doŭh za rasijskuju kampaniju ŭ pamiery 7,98 miljona złotych (1,8 miljona jeŭra).
Pa vyniku ŭ 2024 hodzie adbyŭsia ŭzajemazalik. Polskaja kampanija zaličyła častku doŭhu za prodaž byłoj rasijskaj dački ŭ košt dyvidendaŭ, jakija pavinna Zubaryku i Niaronskaj.
Kampanija zaličyła 5 miljonaŭ złotych doŭhu za rasijskuju kampaniju za takuju ž častku dyvidendnaha doŭhu i śpisała 2 miljony złotych sabie na stratu. I zastałasia vinnaja jašče 2,98 miljona złotych dyvidendaŭ Zubaryku i Niaronskaj.
Pry hetym niahledziačy na prodaž kampanii, Transexpedition Polska dahetul zastajecca jak «partnior» na sajcie hrupy kampanij «Syravinnyja resursy-bieł», jakaja naležyć Ludmile Niaronskaj i Arturu Zubaryku.
Ciapierašniaja ž uładalnica Transexpedition Polska Hanna Mašera praciahvaje raźvivać biznes u Polščy. U červieni 2025 hoda jana zarehistravała novuju firmu ŭ Biełastoku — Krafttrade. Kampanija płanuje zajmacca ekśpiedycyjaj, łahistykaj i nieśpiecyjalizavanym hurtovym handlem.
Ciapier čytajuć
Žychary Hrušaŭki i Michałova zastajucca biez deputatki: čempijonka Mirončyk-Ivanova źbirajecca ŭ dekret13
Kamientary
Tot žie iźviestnyj Vasilij Śmietanin, hruzopierievozki (Džienti śpiedišn), svoi polskije kontory, v t.č. biełostokskije i avstrijskuju pierieoformił na druhich lic.