Лукашэнка абвінаваціў школьных кухараў у крадзяжы. Людзі пакрыўдзіліся
На нядаўняй нарадзе Аляксандр Лукашэнка наракаў на працу школьных сталовых: «У кожнай школе ў нас сталовая — лічыце, забягалаўка. (…) Немагчыма гэта пракантраляваць, асабліва крадзеж». У тыктоку тэма выклікала бурнае абмеркаванне. Пад адным з ролікаў за суткі пакінулі амаль 900 каментароў.
Частка каментатараў пагадзілася, што крадзеж у сталовых — з’ява сістэмная і даўняя.
«Кухары крадуць усе, нават з добрымі заробкамі. Хтосьці больш, хтосьці менш, але ўсе».
«Кухары ў школе заўсёды кралі і дзяліліся з адміністрацыяй».
«Я працавала ў грамадскім харчаванні! Усе заўсёды бралі і будуць браць!»
«Жабрацкі заробак і пякельная праца»
Аднак пераважная большасць каментатараў абурылася і ўстала на абарону кухараў. Галоўным контраргументам сталі нізкія заробкі і цяжкія ўмовы працы.
«Не ведаю ніводнага кухара з кватэрай на Мальдывах, «Мэрсэдэсам» і банкаўскім рахункам у швейцарскім банку».
«Ну проста ўзарвала. Жабрацкі заробак кухара і пякельная праца. Ніводзін кухар у харомах і на крутых машынах не ездзіць».
Многія адзначылі, што прафесія кухара — няўдзячная, а аплата працы проста смешная, і прывялі канкрэтныя лічбы:
«Аклад кухара 4‑га разраду ў аддзеле адукацыі 300 беларускіх рублёў».
«У кухара ёсць заробак? Я думала, гэта слёзы, а не заробак. Цяжкая праца, але аплата смешная».
«Калі сапраўды плацяць годны заробак, то і красці не будуць. Не трэба на ўсіх таўро злодзея ставіць».
«А дзе вы бачылі добрыя заробкі ў кухара?»
«Прыносяць сваё»
Многія карыстальнікі падзяліліся асабістымі гісторыямі, якія сведчаць пра адваротнае: часам кухары прыносяць сваё, каб зрабіць ежу для дзяцей лепшай.
«Крыўдна. Наш кухар вясной прыносіць зеляніну са свайго агарода, каб дзеткам было смачна і карысна. Дадае духмяныя прыправы, якія сама купляе, каб было па-хатняму».
«Мая мама 40 гадоў адпрацавала кухарам, пенсія мізэрная — 700 руб. Кожны сезон мы дома вырошчвалі шмат зеляніны, каб яна магла прыгожа аформіць стравы».
Многія наракаюць на якасць прадуктаў:
«Кухарам у садках красці няма чаго, дзецям не хапае. Гнілую садавіну і гародніну прывозяць. На пастаўкі ніхто не глядзіць. Часам сам у краму ходзіш дакупляць, каб толькі кладаўшчыку пры праверцы хапіла».
«У школу паступаюць няякасныя прадукты, вось з чаго трэба пачынаць…»
Таксама каментатары звярнулі ўвагу на іншы бок праблемы — умовы працы:
«Мы ў садок яшчэ і алей носім свой. На дражджавыя бліны кроплю даюць. Тэхнолагі на італьянскім абсталяванні страву распрацавалі, дзе алей не патрэбны. 600 рублёў заробак, і ўсюды камеры. Самім есці нельга і з сабой прынесці нельга, бо пакоя для прыёму ежы няма. А як накрычаць, калі выйдзеш падыхаць. Крычаць, што «месца няма?». Пры гэтым спёка, выцяжкі — нічога».
Пра тое, што цяпер усюды камеры і нешта скрасці не атрымаецца, пішуць і іншыя.
«Цяпер паўсюль камеры. Не тыя часы, каб красці. Гэта цяпер мінімальна».
Радыкальныя прапановы і абагульненні
Прагучала і радыкальная прапанова, як вырашыць праблему раз і назаўжды.
«Закрыйце ўсе школьныя сталовыя, хай як ва ўсім свеце, носяць ланч і ссабойкі з дому, не будзе праблем, ніхто не памрэ ад голаду, а можа, пачнуць цаніць працу кухараў».
Асобныя каментатары выйшлі за межы абмеркавання працы кухараў і далі агульную ацэнку сітуацыі ў краіне.
«Прайшло 30 гадоў улады. І што маем — крадзеж, падзеж жывёлы, карупцыя, правал Віцебскай вобласці і г. д.»
Адзін з каментатараў лаканічна падсумаваў агульныя настроі ад выказвання Лукашэнкі:
«Ён увесь народ пакрыўдзіў….»
Цяпер чытаюць
«Пайшлі нах*й вы і ваш «Бацька», пі***асы!» П'яныя прыгоды зрабілі армяніна Ярванда палітвязнем. Цяпер ён змагаецца з праблемамі ў Польшчы13
Каментары