Кіраўнік літоўскага дэпартаменту бяспекі: Мінск імкнецца дэстабілізаваць сітуацыю шарамі, але канчатковая мэта незразумелая
Кіраўнік Дэпартамента дзяржаўнай бяспекі Літвы Рэмігіюс Брыдыкіс у размове з журналістамі LRT заявіў, што сітуацыяй з паветранымі шарамі з боку Беларусі Мінск імкнецца дэстабілізаваць абстаноўку ў Літве, але канчатковая мэта застаецца нявызначанай.
«Мы ўсе цяпер у напружанні. Не сумняваюся, што Беларусь ведае, што цяпер адбываецца. Яны разумеюць, і Мінск выдатна ацэньвае сітуацыю. Але мы не можам дакладна сказаць, якая ў дадзеным выпадку мэта», — сказаў Брыдыкіс журналістам.
Кіраўнік ДДБ Літвы адзначыў, што літоўская разведка дапамагае іншым ведамствам у прадухіленні пагроз.
«Мы робім тое, што і заўсёды. Мы ўдзельнічаем у працэсах, прымаем пэўныя меры, якія дазваляюць нам зразумець намеры праціўніка. Мы падалі інфармацыю асобам, якія прымаюць рашэнні, і, спадзяюся, рашэнні будуць адэкватнымі», — заявіў ён.
Генеральны пракурор Ніда Грунскене адмовілася пракаментаваць журналістам, дзейнічаюць арганізатары «дэстабілізуючай» кантрабанднай схемы ў Літве ці Беларусі.
«Я б пакуль не хацела даваць каментароў, бо не хачу нашкодзіць дасудоваму расследаванню», — сказала яна.
Грунскене дадала, што дасудовае расследаванне пакуль не выявіла ніякіх звестак аб тым, што кантрабанда звязаная з чым-небудзь, акрамя арганізаванай злачыннасці, якая імкнецца нажыцца на нелегальным абароце цыгарэт.
«Я не магу сказаць, колькі дасудовых расследаванняў было заведзена, здаецца, каля 13. Але эпізодаў шмат, эпізоды аб'ядноўваюцца ў гэтыя дасудовыя расследаванні. У сувязі з апошнімі падзеямі распачатыя асобныя дасудовыя расследаванні, у нас таксама ёсць падазраваныя, (…) і абраныя меры стрымання», — сказала генпракурор.
Сёння ўрад Літвы прыняў рашэнне пра закрыццё мяжы з Беларуссю мінімум да серады. Пасля пасяджэння ўрада стане вядома пра далейшае развіццё сітуацыі. Літоўскі бок гатовы да доўгатэрміновага закрыцця мяжы.
«Мы ўжо падрыхтавалі рашэнне аб закрыцці мяжы з Беларуссю на неакрэслены тэрмін», — заявіла прэм'ер-міністр Інга Ругінене.
Памежны пераход «Салечнікі» (з беларускага боку «Беняконі») цалкам закрыты, а праз «Меднікі» («Каменны Лог») могуць ехаць некаторыя катэгорыі асоб.
Вечарам 26 кастрычніка чарговы раз была спынена праца Віленскага аэрапорта. Гэта ўжо трэці вечар запар, калі з-за вялікай колькасці кантрабандысцкіх шароў з боку Беларусі спыняліся палёты і закрываліся памежныя пункты пропуску. Агулам у кастрычніку было сарвана больш за 170 рэйсаў у літоўскіх аэрапортах, пацярпелі 27 000 пасажыраў.
Цяпер чытаюць
Лукашэнка: Раман Пратасевіч — даўні супрацоўнік беларускай разведкі14
Каментары