«Франак, адносіны паміж людзьмі могуць будавацца не толькі на маніпуляцыях». Пракоп‘еў даў водпаведзь Бяспалаву. І Вячорку
Сяргей Бяспалаў, былы прэс-сакратар Сяргея Ціханоўскага, апублікаваў пост, у якім расказаў, што канчаткова рассварыўся з Ціханоўскім і расчараваўся ў ім. «Для яго добры толькі адзін чалавек — Пракоп’еў», — сцвярджае Бяспалаў. Вадзім Пракоп’еў пракаментаваў «Нашай Ніве» сітуацыю. Ён патлумачыў, як бачыць будучыню Ціханоўскага, і нечакана звярнуўся да Франака Вячоркі.
Пракоп'еў тлумачыць свае намаганні па Ціханоўскім: «Мая логіка наступная: лёс Беларусі залежыць ад геапалітыкі. Наша вайна — частка сусветнай вайны. І, нягледзячы на тое, што правілы новага ўладкавання свету толькі пішуцца, ужо відавочна, што іх будуць пісаць у Вашынгтоне.
Беларускаму дэмакратычнаму руху патрэбны свой чалавек у ЗША. Нам не перашкодзіць, калі гэты чалавек будзе рэспубліканскіх перакананняў. Нам вельмі дапаможа, калі гэта будзе вядомы чалавек. Калі такі чалавек валодае абаяннем і харызмай і не баіцца выступаць са сцэны — нам моцна пашанцуе. А вось калі жыццёвая гісторыя такога чалавека падобная на палітычны трылер — гэта выкліча ў амерыканцаў жывы інтарэс, і наш уплыў у ЗША вырасце», — кажа ён.
Зразумела, такому чалавеку трэба многае ўмець, яму варта разабрацца ў нюансах амерыканскага палітычнага працэсу і амерыканскага этыкету, дадае Пракоп'еў. Яму патрэбна добрая англійская мова. Ён павінен быць узброены рэалістычнай стратэгіяй. Акрамя таго, ён павінен быць у стане прыцягваць фінансаванне ўнутры беларускай супольнасці, не залежаць ад амерыканскай фінансавай дапамогі і пазбягаць канфлікту інтарэсаў.
«Сяргей Ціханоўскі, акрамя сваёй гераічнай біяграфіі, яшчэ і серыйны прадпрымальнік. Яму не страшна застацца без грантаў. Яму цікава, як працуе палітыка ў ЗША. І ён хутка вучыцца.
Валоданне мовай — вырашальная задача. У адзіночнай камеры ў Сяргея быў час. Там не было дастаткова ежы, але былі кнігі. Сярод іх — слоўнік Мюлера. Дзякуючы гэтаму ў яго сфарміраваўся салідны пасіўны слоўнікавы запас; засталося толькі развіць размоўныя навыкі.
Рэжыму вельмі не спадабаецца, калі ў нас будзе голас у ЗША. Гэта мая пазіцыя, і я разумею, што іншыя могуць думаць інакш», — кажа Пракоп'еў.
Ён дадае, што прачытаў допіс Сяргея Беспалава, былога прэс-сакратара Сяргея.
«І вось што я думаю. Абвінавачванні ў тым, што я маніпулюю Сяргеем, выдаюць лад мыслення рэальнага аўтара гэтага допісу. Але я запэўніваю вас, Франак, што адносіны паміж людзьмі могуць будавацца не толькі на маніпуляцыях — і шчыра рэкамендую калі-небудзь паспрабаваць», — нечакана завяршае Вадзім Пракоп'еў.
Цяпер чытаюць
Полк Каліноўскага паведаміў пра гібель трох байцоў2
Каментары