«Даўлюся ласосем, бо на карпа не хапіла»: беларусы высмейваюць чарговы фэйк прапаганды
Сюжэт СТБ пра тое, як палякі «галадаюць» перад Калядамі, выклікаў буру сарказму ў сацсетках. Карыстальнікі Threads на розныя лады расказваюць, як выжываюць.
«Калядныя святы для палякаў суправаджаюцца фінансавым напружаннем. Паводле апытанняў, усё больш сем’яў не могуць сабе дазволіць звычайныя падарункі і прадукты. Цэны ў краіне растуць хутчэй за калядныя чаканні», — з сур’ёзнымі тварамі заявілі вядучыя праграмы «24 гадзіны» на СТБ.
«У краіне на 13% выраслі цэны на прадукты. Асабліва падаражэлі мяса, сыры, шакалад і рыба. Так, кілаграм карпа ў Польшчы каля 60 злотых. Гэта амаль 50 беларускіх рублёў», — расказвалі ў праграме.
Гэты сюжэт заўважыў адзін з карыстальнікаў Threads і іранічна запытаўся ў суполкі:
«Можа, хто ведае, на якім сметніку ў Польшчы можна пратэрміноўкі набраць да навагодняга стала? Хацелася б скуркі ад мандарынаў знайсці, каб хоць пах быў да Новага года».
«Зусім ашалелі. Як з такімі цэнамі Новы год сустракаць?»
Допіс не застаўся без увагі іншых беларусаў, сярод якіх шмат тых, хто жыве ў Польшчы. Яны абурыліся нахабнай хлуснёй пра цэны і пачалі спаборнічаць у «трагічных» гісторыях пра сваё гаротнае жыццё, стылізуючы каментары пад наратывы дзяржТБ.
«Мы на рынку бралі скрыню мандарынаў (10 кг) за 15 злотых (каля 12 рублёў — НН), а ў краме яны ўжо ў два разы даражэйшыя! Цэны непад’ёмныя! Свежае мяса ўчора ў «Бедронцы» па 6 зл/кг (4,80 рубля — НН) прадавалі… Зусім ашалелі. Як з такімі цэнамі Новы год сустракаць?»
«Так, рыба вельмі дарагая. Філе ахалоджанага ласося без костак — 49,9 злотага (40 рублёў — НН). А перад Калядамі ў «Бедронцы» яшчэ і другое бясплатна давалі. Муж як прынёс мне 2 кг па цане аднаго, дык я плакаць пачала… Усю зарплату патраціў! І карпа па 17 злотых (каля 14 рублёў — НН) купілі ўсяго 5 кг, а не больш, як я хацела. Вось у Беларусі ласось наогул задарма, напэўна…»
«Не змагла сабе дазволіць карпа, прыйшлося давіцца філе ласося. Каўбаса дарагая, прыйшлося купіць прашута. Вельмі цяжка».
«На нармальны сыр не хапіла, прыйшлося з цвіллю браць — бры і гарганзолу нейкую. «Савецкага шампанскага» няма, даводзіцца купляць французскае. Яшчэ і не паўсалодкае, а брут! Жах, карацей».
«Страшна жыць у Польшчы, страшна… голадна і холадна. Чэснае слова! Ладна, пайду бутэрброд з ласосем зраблю, а то больш ні на што грошай не хапіла».
«А мы з такімі цэнамі нават стол накрываць на Новы год не будзем, ідзём на бясплатны канцэрт. Нейкі Стынг будзе спяваць. Думаю, ад немагчымасці накрыць стол прыйдзе шмат людзей — скучкуемся, хоць на ацяпленні сэканомім».
Аўтар допісу запосціў таксама карцінку багата накрытага стала і падпісаў — «калядны стол сярэднестатыстычнага завадчаніна ў Беларусі».
«Гэта ўсё на заводзе выдалі?» — пытаюцца.
«Не. Усё ў кадр не змясцілася, што выдалі. Прыйшлося прафсаюзам яшчэ і па дадатковым халадзільніку падарыць кожнаму».
Чаму палякі не ведаюць «праўды»?
Беларусы пажартавалі і з таго, чаму самі жыхары Польшчы не ў курсе свайго «гаротнага» становішча.
«А палякі ведаюць пра гэта?» — спытаў нехта.
«Вядома, не! Вы бачылі, колькі ў іх электрычнасць каштуе? Далёка не кожны можа дазволіць сабе ўключыць тэлевізар, каб даведацца праўду», — іранізуюць у адказ.
Некаторыя ідуць далей і з гумарам развіваюць наратыў беларускай прапаганды:
«Польшча адкрыла яшчэ два пераходы, каб палякі маглі закупіцца якаснымі таннымі прадуктамі да святаў у Беларусі».
«Чакаю на Новы год пасылку ад бацькоў: кілаграм грэчкі і пуд солі…»
«Беларусь ужо рыхтуе армію дронаў з грэчкай і карпамі замест баявой часткі».
«Няўжо нехта ў гэта верыць?»
Аднак за жартамі хаваецца і стома ад пастаяннай хлусні. Многія карыстальнікі заўважаюць, што пакуль дзяржТБ шукае праблемы ў суседзяў, сітуацыя ў самой Беларусі далёкая ад ідэалу.
«Няўжо нехта ў гэта верыць? Вельмі кампетэнтныя, калі гаворка ідзе пра эканоміку іншай краіны. Свае надоі і сенакосы ўжо ўсе абмеркавалі?» — абураецца адзін з каментатараў.
«Толькі не забудзьцеся расказаць, што тут перад святамі мора акцый. Бяры — не хачу, зніжак вельмі шмат. А ў нас у РБ як заўсёды ўсё вырасце ў цане, усе хочуць стаць багатымі за адзін дзень», — дадае іншы.
«Так люблю беларускія СМІ… То палякі бягуць да нас па грэчку, то мерзнуць… Цяпер сталі беднымі да Новага года. А ў нас нібыта ўсё гуд?! Цэны паляцелі ў космас, заробкі, мякка кажучы, не як па тэлевізары. Але за мяжой, відаць, відней…»
Цяпер чытаюць
Топавы перакладчык паехаў у Беларусь мяняць пашпарт — і сеў за данаты. «КДБ паглядзеў на суму і вырашыў, што ніхто ў здаровым розуме не можа выдаткаваць столькі ўласных грошай»1313
Каментары