Мінздароўя пракаментавала трагедыю ў Дзяржынскай бальніцы, дзе памерлі парадзіха і немаўля

Міністэрства аховы здароўя выказала спачуванні сям’і жанчыны, якая памерла 8 сакавіка ў Дзяржынскай ЦРБ. Створана камісія для расследавання.

«Паведамляем, што ў гэты момант працуе спецыяльная камісія ў складзе пазаштатных спецыялістаў Міністэрства аховы здароўя. Ацэньваюцца ўсе этапы аказання медыцынскай дапамогі. Канчатковы дыягназ будзе ўстаноўлены пасля атрымання вынікаў патолагаанатамічнага разбору і правядзення судова-медыцынскай экспертызы», — гаворыцца ў каментары. 

Акрамя таго, начальнік галоўнага ўпраўлення арганізацыі медыцынскай дапамогі Міністэрства аховы здароўя Леанід Недзень паведаміў, што 

прынята рашэнне аб прыпыненні рэалізацыі і медыцынскага выкарыстання лекавага прэпарата. Што за прэпарат, ён не назваў. 

8 сакавіка ў Дзяржынскай ЦРБ памерла 26‑гадовая цяжарная жанчына, яе дзіця медыкі таксама не змаглі выратаваць. Парадзіха знаходзілася прыблізна на 34 тыдні цяжарнасці.

Галоўная доктарка Дзяржынскай ЦРБ Алена Падалянчык дала сціплы каментар «Анлайнеру»: «Пакуль толькі скажу: медыкі зрабілі ўсё, што змаглі. Гэта я кажу з усёй адказнасцю: усё, што змаглі».

Дык што адбылося? У тым самым допісе ў Threads калега сцвярджала, што прычынай смерці стаў анафілактычны шок ад прэпарату. Гэтую інфармацыю пацвердзілі і крыніцы «Нашай Нівы». Са слоў людзей, знаёмых з сітуацыяй, жанчыне ўвялі антыбіётык цэфтрыаксан.

Менавіта гэты антыбіётык раней трапляў у скандал. У студзені 2017 года толькі за адзін тыдзень было зафіксавана тры выпадкі анафілактычнага шоку ад цэфтрыаксана: два школьнікі трапілі ў бальніцу ў цяжкім стане, адна жанчына памерла. У гэтых выпадках выкарыстоўвалі як айчынны прэпарат, так і замежны.

Пасля смяротнага выпадку цэфтрыаксан часова забаранілі ў Беларусі. Тады віцэ-прэм'ер Васіль Жарко заявіў, што ў 2016 годзе ў краіне было зафіксавана 25 выпадкаў алергічнай рэакцыі на гэты антыбіётык — беларускай, расійскай і польскай вытворчасці.

Сярод тых 25 выпадкаў большасць засталася невядомай для грамадства. Рэзананснай стала толькі смерць парадзіхі ў Маладзечне. Тады 27‑гадовая Кацярына нарадзіла здаровага сына, але праз некаторы час ёй стала дрэнна. Медыкі ўвялі жанчыне беларускі цэфтрыаксан — і яна загінула ад анафілактычнага шоку.

За паўгода да Кацярыны ў той жа Маладзечанскай радзільні загінула іншая жанчына. Прычынай таксама стаў анафілактычны шок пасля ўведзенага антыбіётыку.

Але ж Васіль Жарко спрабаваў заспакоіць, што за мяжой алергічных рэакцый на цэфтрыаксан фіксуюць больш.

Трэба адзначыць, што праблемы з цэфтрыаксанам сапраўды ўзнікалі не толькі ў Беларусі. Напрыклад, ва Украіне забаранялі гэты антыбіётык (украінскай вытворчасці) у 2019 годзе — таксама пасля смяротнага выпадку.

У выніку цэфтрыаксан усё ж зноў дазволілі выкарыстоўваць у Беларусі — адбылося гэта ў сакавіку 2017 года.

• 0
• 0
• 1
• 0
• 0
• 3
• 7
• 0