У Эўрапарлямэнце Дзень Беларусі, старшыня Эўрапарлямэнту сустрэўся зь Мілінкевічам
Дзень Беларусі быў арганізаваны фракцыяй Эўрапейскай народнай партыі «Эўрапейскія дэмакраты».
У чацьвер у Эўрапарлямэнце прайшоў Дзень Беларусі, арганізаваны фракцыяй Эўрапейскай народнай партыі «Эўрапейскія дэмакраты». З гэтай нагоды ў Брусэлі знаходзіліся экс‑кандыдат на прэзыдэнта Беларусі Аляксандар Мілінкевіч, старшыня Партыі БНФ Вінцук Вячорка, старшыня Беларускай асацыяцыі журналістаў Жанна Ліцьвіна, доктар сацыялёгіі Андрэй Вардамацкі, а таксама Ірына Казуліна.
У слуханьнях бралі ўдзел прадстаўнікі Эўрапарлямэнту, Эўразьвязу, Парлямэнцкай асамблеі Рады Эўропы, Дзярждэпартамэнту ЗША.
У сераду ж Аляксандар Мілінкевіч меў сустрэчу з новым старшынём Эўрапарлямэнту Гансам-Гертам Потэрынгам. Старшыня Эўрапарлямэнту выказаў упэўненасць, што перамога дэмакратыі ў Беларусі “гэта толькі пытаньне часу”: "Беларусь належыць да сям’і эўрапейскіх народаў. Грамадзяне Вашай краіны маюць права на свабоду. Мы асуджаем палітыку сьвядомага парушэньня правоў чалавека і грэбаваньня асноўнымі свабодамі, якую вядзе рэжым у Менску. Перакананы, што перамога дэмакратыі ў Беларусі толькі пытаньне часу", - заявіў Потэрынг.
Каментары