Канфлікт на Валожыншчыне: Юрый Чыж хоча адкрыць вытворчасць бекона
Мясцовыя жыхары пратэстуюць: свінакомплекс будуецца за 5 км ад Налібоцкай пушчы.
У нядаўнім пасланні Аляксандр Лукашэнка заявіў, што не дазволіць выкарыстоўваць для «старонніх» мэтаў ворныя землі. Але на Валожыншчыне цяпер якраз адбываецца нешта падобнае. СТАА «Данпрод» пачынае будаваць прадпрыемства па вытворчасці бекона. Людзі лічаць, што незаконна і на шкоду экалогіі. — Будаўніцтва свінакомплексу агульнай плошчай 2,5 тыс. га на 110 тыс. галоў наносіць страты СВК «Пяршаі».
Будаўнічыя працы вядуцца на поле, засеянае рапсам, зняты грунт ссыпаецца самазваламі на поле, засеянае пшаніцай.Такія дзеянні цалкам ігнаруюць рашэнне прэзідэнта аб недапушчальнасці будаўнічых работ на сельскагаспадарчых плошчах, — сказана ў звароце ініцыятыўнай групы жыхароў вёсак Даўгулеўшчына, Канюшаўшчына і Пяршаі.
Грамадзяне называюць некалькі прычын, чаму будаваць комплекс нельга.
— У сувязі з вялізнымі тэрытарыяльнымі патрэбамі свінакомплексу сумеснага таварыства «Данпрод» будуць нанесеныя тэрытарыяльныя страты іншым гаспадаркам, ўгоддзі якіх будуць аддадзены для абслугоўвання свінакомплексу. Будуць знішчаныя працоўныя месцы — у сувязі са стратамі ворных угоддзяў, а таксама маленькім штатам супрацоўнікаў будуемага аграпрадпрыемства.
Свінакомплекс плануецца ўзводзіць па дацкай тэхналогіі, якая прадугледжвае санітарную зону ўсяго 1 км, нягледзячы на памеры комплексу. Многія хаты ў вёсках у гэтую зону трапляюць. Пацерпіць, па словах грамадзян, і экалогія рэгіёну.
Побач праходзяць «зялёныя» маршруты, працуюць аграсядзібы, за 5 км ад будаўніцтва размешчана знакамітая Налібоцкая пушча…
— Вакол будоўлі штучна створана заслона сакрэтнасці: на будаўнічай пляцоўцы няма пашпарта аб’екта, прадстаўнік кампаніі адсутнічае па юрыдычным адрасе, — кажуць людзі. — Мы абураныя грэбаваннем нашых грамадзянскіх і маёмасных правоў і просім перанесці будаўніцтва ў менш населенае месца.
У Валожынскім райвыканкаме такой рэакцыі грамадзян здзівіліся.
— Няма там ніякай праблемы. Гэта ж будуюць «трайплаўскія» — Юрый Чыж, —растлумачыў Іосіф Ляшкевіч, намеснік старшыні райвыканкама па пытаннях будаўніцтва і ЖКГ. — Там закрыты комплекс, пытанняў няма. Па экалогіі ніякіх парушэнняў няма. Ад вёсак ён далёка, санітарныя нормы выкананыя…
Цяпер чытаюць
«Заходзіш у камеру, а яны кажуць: «Мы з табой адмаўляемся сядзець». Ціханоўскі расказаў, як сутыкнуўся з праблемай нізкага статусу12
Каментары