Kanflikt na Vałožynščynie: Juryj Čyž choča adkryć vytvorčaść biekona
Miascovyja žychary pratestujuć: śvinakompleks budujecca za 5 km ad Nalibockaj puščy.
U niadaŭnim pasłańni Alaksandr Łukašenka zajaviŭ, što nie dazvolić vykarystoŭvać dla «starońnich» metaŭ vornyja ziemli. Ale na Vałožynščynie ciapier jakraz adbyvajecca niešta padobnaje. STAA «Danprod» pačynaje budavać pradpryjemstva pa vytvorčaści biekona. Ludzi ličać, što niezakonna i na škodu ekałohii. — Budaŭnictva śvinakompleksu ahulnaj płoščaj 2,5 tys. ha na 110 tys. hałoŭ nanosić straty SVK «Piaršai».
Budaŭničyja pracy viaducca na pole, zasiejanaje rapsam, źniaty hrunt ssypajecca samazvałami na pole, zasiejanaje pšanicaj.Takija dziejańni całkam ihnarujuć rašeńnie prezidenta ab niedapuščalnaści budaŭničych rabot na sielskahaspadarčych płoščach, — skazana ŭ zvarocie inicyjatyŭnaj hrupy žycharoŭ viosak Daŭhuleŭščyna, Kaniušaŭščyna i Piaršai.
Hramadzianie nazyvajuć niekalki pryčyn, čamu budavać kompleks nielha.
— U suviazi ź vializnymi terytaryjalnymi patrebami śvinakompleksu sumiesnaha tavarystva «Danprod» buduć naniesienyja terytaryjalnyja straty inšym haspadarkam, ŭhodździ jakich buduć addadzieny dla absłuhoŭvańnia śvinakompleksu. Buduć źniščanyja pracoŭnyja miescy — u suviazi sa stratami vornych uhodździaŭ, a taksama maleńkim štatam supracoŭnikaŭ budujemaha ahrapradpryjemstva.
Śvinakompleks płanujecca ŭzvodzić pa dackaj technałohii, jakaja praduhledžvaje sanitarnuju zonu ŭsiaho 1 km, niahledziačy na pamiery kompleksu. Mnohija chaty ŭ vioskach u hetuju zonu traplajuć. Pacierpić, pa słovach hramadzian, i ekałohija rehijonu.
Pobač prachodziać «zialonyja» maršruty, pracujuć ahrasiadziby, za 5 km ad budaŭnictva raźmieščana znakamitaja Nalibockaja pušča…
— Vakoł budoŭli štučna stvorana zasłona sakretnaści: na budaŭničaj placoŭcy niama pašparta abjekta, pradstaŭnik kampanii adsutničaje pa jurydyčnym adrasie, — kažuć ludzi. — My aburanyja hrebavańniem našych hramadzianskich i majomasnych pravoŭ i prosim pieranieści budaŭnictva ŭ mienš nasielenaje miesca.
U Vałožynskim rajvykankamie takoj reakcyi hramadzian ździvilisia.
— Niama tam nijakaj prablemy. Heta ž budujuć «trajpłaŭskija» — Juryj Čyž, —rastłumačyŭ Iosif Laškievič, namieśnik staršyni rajvykankama pa pytańniach budaŭnictva i ŽKH. — Tam zakryty kompleks, pytańniaŭ niama. Pa ekałohii nijakich parušeńniaŭ niama. Ad viosak jon daloka, sanitarnyja normy vykananyja…
Ciapier čytajuć
Učora Minsk znoŭ zatapiła. Čamu stalica nie hatovaja da daždžoŭ?2
Kamientary