«Я ўсё больш чую заяваў пра тое, што еўрапейскія дыпламаты тут чакаюць нейкай амністыі, зноў заводзячы гаворку па палітвязнях».
Беларусь чакае канкрэтных крокаў ад Захаду, якія будуць спрыяць нармалізацыі адносін. Пра гэта 24 мая заявіў Аляксандр Лукашэнка, прымаючы з дакладам міністра замежных спраў Сяргея Мартынава.
Лукашэнка папрасіў Мартынава паведаміць аб сітуацыі на еўрапейскім напрамку. «Я ўсё больш чую заяваў пра тое, што еўрапейскія дыпламаты тут чакаюць нейкай амністыі, зноў заводзячы гаворку па палітвязнях і гэтак далей, — адзначыў Аляксандр Лукашэнка. —
Я адразу хачу публічна сказаць, што да гэтай тэмы я больш не вяртаюся. Я ўсё сказаў публічна і раней у Пасланні беларускаму народу і парламенту.Сваю пазіцыю я не бачу падстаў на гэты момант мяняць».
«Мы чакаем канкрэтных крокаў ад Захаду, Еўрапейскага саюза. Мяч на іх баку. Гэта маё цвёрдае перакананне.
Таму чакаць зноў гэтай гульні на старых інструментах па старых нотах я не збіраюся»,— падкрэсліў Лукашэнка.
Ён даў даручэнні наконт курса, якога Беларусь павінна прытрымлівацца для нармалізацыі адносін з заходнімі партнёрамі пры няўхільным захаванні нацыянальных інтарэсаў, а таксама зыходзячы з мэтаў нармальнага і прадуктыўнага ўзаемадзеяння, паведамляе БелТА.
У сваім Пасланні 8 мая, Лукашэнка, звінаваціў Захад і апазіцыю ў зрыве дыялогу з уладамі:
«На працягу апошніх гадоў мы развівалі грамадзянскую супольнасць, -- сказаў ён. -- Падтрымлівалі грамадскі дыялог. Забяспечвалі празрыстыя і адкрытыя ўмовы для правядзення выбараў, поўную свабоду для кандыдатаў. Іншае пытанне, як яны скарысталіся гэтак шырокімі магчымасцямі. Апошнія выбары 2010 года паказалі, што не на карысць народа -- абразы ў адрас краіны і ўлады па тэлебачанні, пагромы на вуліцах, заклікі да тэрору, гвалту. Затое кожны беларус змог убачыць, чаго варта апазіцыя, так званая, і яе кандыдаты. Лепшай агітацыі за дзеючую ўладу складана прыдумаць.
Пасля выбараў 2010 года мы разлічвалі ісці тым жа шляхам -- паглыбляць дыялог з Еўропай, ЗША, развіваць так званую грамадзянскую супольнасць, унутрыпалітычны дыялог, удасканальваць палітычную сістэму.
Але Захад і наша «пятая калона» вырашылі па-іншаму. Яны не проста адмовіліся ад дыялогу, а пачалі атаку на нашу краіну праз ціск і санкцыі.
Спадзяюся, што сёння многія пераканаліся: гэта шлях у тупік", -- сказаў тады Лукашэнка.
Каментары