Ліда: уладальнікам спадарожнікавых талерак пагражаюць штрафамі. Падрыхтоўка да адкрыцьця «ТВ БелСАТ»?
У Лідзе мясцовыя ўлады пад пагрозай штрафу патрабуюць, каб жыхары здымалі спадарожнікавыя антэны.
Штраф у 15 базавых велічыняў (465 тыс. рублёў) і прымусовая ліквідацыя антэны — вось што пагражае ўладальнікам спадарожнікавых талерак у Лідзе, калі яны не падпарадкуюцца патрабаваньню камунальнікаў і не прыбяруць іх самі з дамоў і дахаў. Такія аб’явы ЖЭСы гораду разьвесілі па пад’ездах ва ўсіх мікрараёнах. Як расказаў радыё «Рацыя» мясцовы жыхар Сяргей Коваль, перад гэтым кожнага з уладальнікаў антэнаў ЖЭСы папярэджвалі асабіста.
Коваль: "Спачатку патэлефанавалі з ЖЭСу дахаты: "Вы ведаеце, спадарожнікавая талерка — незаконная, прыйдзіце да нас у ЖЭС, мы вам дамо папярэджаньне". Я кажу: "Ды вы што?! З глузду зьехалі?!". Тады яны кажуць, што талеркі будуць здымацца прымусова, і нам будзе выпісаны штраф, прыкладна 700 даляраў. Пасьля па ўсіх пад’ездах наляпілі аб’яваў, каб здымалі антэны. Гэта па ўсім горадзе".
Як расказала «Рацыі» супрацоўніца аднаго з ЖЭСаў, распараджэньне пра ліквідацыю спадарожнікавых талерак прыйшло ад Лідзкага жыльлёва-рамонтнага эксплюатацыйнага прадпрыемства за подпісам намесьніка дырэктара Віктара Вайтулевіча. Пасьля гэтага супрацоўнікі ЖЭСаў абышлі ўсе дамы і перапісалі ўладальнікаў антэнаў. Сяргей Коваль упэўнены, што такім чынам мясцовыя ўлады ня хочуць дапусьціць прыёму незалежнага беларускага спадарожнікавага тэлеканалу "БЕЛСАТ", які плянуе пачаць вяшчаньне ўвосень.
Коваль: "Я так думаю, што гэта яны на асобным рэгіёне вырашылі "абкатаць", паглядзець на рэакцыю насельніцтва напярэдадні запуску новага спадарожнікавага беларускага каналу, які будзе вяшчаць з-за мяжы на Беларусь. Калі мы гэтую "пілюлю" праглынём, то такая практыка распаўсюдзіцца на ўсю краіну".
Нягледзячы на пагрозы, паводле супрацоўніцы лідскага ЖЭСу, ніхто з жыхароў патрабаваньню камунальнікаў пакуль не падпарадкаваўся.
Цяпер чытаюць
З праекта будаўніцтва мінскага метро выкінулі яшчэ дзве станцыі — «Кіеўскі сквер» і «Політэхнічную»7
Каментары