«Міс Потэр», «Пісьменьнікі свабоды», «Напалеон»
Касьцюмныя гістарычныя драмы і сацыяльная гісторыя пра выхаваньне.
Міс Потэр (Miss Potter)
Вялікабрытанія – ЗША, 2006, каляровы, 92 хв.
Рэжысэр: Крыс Наон
Ролі выконваюць: Рэнэ Зэльвэгер, Юэн Макгрэгар, Эмілі Ўотсан, Барбара Флін, Біл Пэтэрсан, Лойд Оўэн
Жанр: Біяграфічная драма
Адзнака: 7 (з 10)
Дзіцячую пісьменьніцу Бэатрыкс Потэр шануюць і любяць у ангельскамоўным сьвеце. Томас Эліат, Крыстафэр Ішэрвуд, Грэм Грын захапляліся дзіцячымі гісторыямі, напісанымі з тонкай іроніяй.
Бэатрыкс Потэр жыла напрыканцы ХІХ стагодзьдзя, калі творчая праца жанчыны не ўхвалялася.
Гераіня спрабуе выдаць дзіцячую кніжку з уласнымі ілюстрацыямі. Выдаўцы-мужчыны са скепсісам ставяцца да гэтай ідэі, але, нарэшце, пагаджаюцца, прапанаваўшы гераіні ў якасьці рэдактара свайго недарэку-брата.
Два “партызаны” віктарыянскай эпохі – “малодшы брат” і жанчына-пісьменьніцца знаходзяць агульную мову, і неўзабаве іхняя праца перарастае ў каханьне… Але матуля Бэатрыкс ня лічыць выдаўца годнаю партыяй…
Узважаная й грунтоўная драма з дасьціпным і вытанчаным дуэтам Рэнэ Зэльвэгер і Юэна Макгрэгара. Рэалістычная гісторыя суворай віктарыянскай эпохі суправаджаецца ўдалымі анімацыйнымі грымасамі ажыўленых гусак, трусаў і коцікаў.
Пісьменьнікі свабоды (Freedom Writers)
ЗША – Нямеччына, 2007, каляровы, 123 хв.
Рэжысэр: Рычард ЛаГравэнэс
Ролі выконваюць: Гілары Сўонк, Патрык Дэмпсі, Скот Глен, Імельда Стонтан, Джэйсан Фін
Жанр: Сацыяльная драма
Адзнака: 5,5 (з 10)
Маладзенькая настаўніца ангельскай мовы (Гілары Сўонк) выкладае ў школе каліфарнійскага гарадку Лонг-Біч. Гарадок славіцца бандыцкімі традыцыямі – і кожны з вучняў так ці інакш знаёмы з крымінальным сьветам і наркотыкамі. Старыя настаўнікі раяць гераіні паставіцца да сваёй працы фармальна і не зважаць на дзяцей, якіх ужо і “ня выправіш”. Але гераіня здавацца не зьбіраецца. Яна прапануе вучням завесьці дзёньнікі – і запісваць усё, што баліць…
Так “цяжкія падлеткі” з крымінальных кварталаў становяцца “пісьменьнікамі свабоды”.
Пэдагагічная й сацыяльная драма, што разыграна Гілары Сўонк, заснаваная на сапраўднай гісторыі – і разглядаецца многімі, як кіраўніцтва да дзеяньня.
У Злучаных Штатах касавы прыбытак ад карціны ў паўтары разы пераўзыйшоў бюджэт.
Напалеон N (Io e Napoleone)
Францыя – Італія – Гішпанія, 2006, каляровы, 100 хв.
Рэжысэр: Паала Вірзі
Ролі выконваюць: Даніэль Атой, Эліа Джэрмана, Моніка Бэлючы, Сабрына Імпачыаторэ, Валерыа Мастандрэа
Жанр: Гісторыка-біяграфічная драма з іранічным адценьнем
Адзнака: 6 (з 10)
1814 год. Востраў Эльба. Марціна – бібліятэкар былога Імпэратара. Малады чалавек ненавідзіць Напалеона і нат жадае яго забіць, але складае калекцыю ягоных фразаў…
Карціна Паала Вірзі дэманструе знакамітага імпэратара ў адстаўцы: ён плача, кушае, прыдумвае афарызмы… і ўсё яшчэ ўлюбёнец натоўпу.
Драма зь лёгкай іранічнай усьмешкай дэманструе мэханізмы шаленства ад тыраніі, правінцыйнага стодапакланеньня – і нішчымнасьць самога дыктатара. Імпэратара разьвінчана-гратэскна і плаксіва-патасна сыграў Даніэль Атой.
Каментары