спорт
Літоўская рука
Пару гадоў таму беларуская моладзевая зборная па баскетболе выйграла чэмпіянат Эўропы. Усім здавалася, што вось ён — зорны час беларускага баскету. Беларусь проста ашалела ад думкі, што мы неўзабаве будзем размазваць па пляцоўцы розныя там dream team-ы. Але ўсё павярнулася зусім ня тым бокам.
...Калі Беларусь ганебна прайгравала ў менскім Палацы спорту эстонскай зборнай з розьніцай 15 ачкоў, тамтая перамога на першынстве Эўропы здавалася сном. Калі беларусы выходзілі на пляцоўку перад хатнімі сустрэчамі, некаторым заўзятарам здавалася, што перад гульнёй беларускія джорданы не адныя суткі кілбасілі слынны беларускі напой «Крыжачок». І сапраўды, якія там перамогі, калі пад час гульні беларусы толькі і рабілі, што бралі тайм-аўты ды жлукцілі вадзічку. Сушнячок...
У зборнай трэ было нешта мяняць. Гэта разумелі ўсе. Але ніхто не разумеў, што ды як мяняць. Зьмена спартовых майткоў, відавочна, ні да чога не прывяла б. Таму «шышкі» айчыннага баскетболу, памазгаваўшы, прыдумалі — стварыць базу для нацыянальнай дружыны. Гэтай базай павінен быў стаць наш беларускі чэмпіён — «Горадня-93». Але адразу ж агаліўся іншы трабл: прыстойная каманда, каб расьці, мусіць гуляць у прыстойным турніры. Чэмпіянат Беларусі, пры ўсёй яго сіле, ня можа й блізка насіць гордае найменьне «прыстойны турнір». Заставалася адзінае выйсьце — паўночнаэўрапейская баскетбольная ліга.
Прашчаміцца ў гэтыя салідныя спаборніцтвы — залатая мара нашых флагманаў, бо, акрамя моцных супернікаў, арганізатары забясьпечваюць клюбы баблом на пераезды ды хаўчыкам. Халява вабіць рускую душу... Толькі вось да апошняга часу ў лізе адмахваліся ад дэлегацыяў зь Беларусі.
І не сьвяціла б нашай камандзе ніякая ПЭБЛ, калі б не знайшоўся добры жмудзін — камісіянэр лігі Шарунас Марчулёніс. Зрабіўшы колькі візытаў на Гарадзеншчыну, Шарунас зазначыў, што тамтэйшы Лядовы палац — ідэальнае месца для правядзеньня матчаў ПЭБЛу (праўда, спачатку трэ закупіць спэцпакрыцьцё, бо не гуляць жа на лёдзе). А пасьля прагучала радасная для нас фраза: «Каманда зь Беларусі стала рэальным кандыдатам на ўступленьне ў лігу». Дык во, Горадню незабавам мо будуць па «эўраспорце» паказваць.
Богусь Біятлянёнак
Каментары