Міліцыя бязьдзейнічала
Напярэдадні Дня вызваленьня Беларусі ад нацыстаў іх пасьлядоўнікі прайшлі маршам па Горадні.
2 ліпеня 30 РНЕшнікаў свабодна прайшлі па гарадзенскіх вуліцах. Відаць, для вылазкі мабілізаваныя былі сябры арганізацыі з усяе Беларусі. Пачалі зь пешаходнай Савецкай. Міліцыя сачыла за чорнакашульнікамі, але паводзіла сябе надзвычай далікатна. Нават зусім недалікатны АМАП. Усім цікаўным, якіх абурыла здарэньне, у Ленінскім РУУС цярпліва тлумачылі: гэта, маўляў, прыехалі “на экскурсію” госьці з Расеі й Украіны. А затрымліваць іх не было прычыны: яны нічога не парушалі, ішлі па тратуары. Вось такая ў нас міліцыя “лагодная”. Папросту як у песьні: “Беларусь — край адкрытых дзьвярэй, горад Гродна, Савецкая, восем”. Міліцыянты замоўчваюць толькі адну акалічнасьць: ішлі РНЕшнікі ў чорнай уніформе з нацысцкай сымболікай. Дэманструючы неўміручасьць ідэяў “новага парадку”. А каб прыехалі “экскурсанты” не з расейскімі, а зь нямецкімі свастыкамі? У форме СС?
Факт навідавоку: ведамства міністра Навумава дазволіла нацыстам зладзіць вылазку напярэдадні Дня вызваленьня.
Сяргей Краўцоў, Горадня
Цяпер чытаюць
«Пераапрануўся ў амапаўца і дырыжыраваў чорнай дубінкай». Адзін з заснавальнікаў «Вольнага хору» — пра акцыі ў гандлёвых цэнтрах у 2020‑м і працу ў філармоніі ў Літве55
Каментары