Hienij dona Fabijo

U minułuju piatnicu futbalisty «Juventusu» daterminova stali čempijonami Italii.

Adnak u seryi A ŭsio stała jasna dva tydni tamu, kali ŭ vočnaj sprečcy turynski klub syšoŭsia z hałoŭnym kankurentam — «Milanam». «Juve» pieramoh 1:0, i tolki cud moh nie dazvolić turyncam zavajavać skudeta ŭ 28-my raz. Ale ci stali b čempijonami bjanka-nery, kab uletku klub nie ŭznačaliŭ Fabijo Kapella, što, miž inšym, hulaŭ za «Juventus» u 1970—1976 h.? Usie kamandy, jakija treniravaŭ don Fabijo, stanavilisia čempijonami.

Hulec

Fabijo Kapella pryjšoŭ na śviet 18 lipienia 1946 h. u maleńkim haradku Pjarysa na poŭnačy Italii (vobłaść Fryuli). Tam i pačaŭ hulać u futboł, demanstrujučy vykštałconuju techniku, jakoj tak brakavała pahodkam. Pierspektyŭnaha 16-hadovaha chłopca zaŭvažyli skaŭty «Spali» (Ferara).

Napačatku trenery mała daviarali junaku, i chłopca sasłali ŭ zapas. Ale praz try hady «Spal» vybyła ŭ seryju V, i, jak vodzicca ŭ Italii, viadučyja hulcy pakinuli klub. Kapella ŭ 19-hadovym vieku staŭ lideram kamandy i viarnuŭ klub z Ferary ŭ seryju A. Nadoŭha ŭ «Spali» Kapella nie zatrymaŭsia: na jaho źviarnuli ŭvahu trenery «Romy».

Rymlanie tady byli nia prosta na ŭzdymie — u skład kamandy ŭvachodzili maładyja j perspektyŭnyja hulcy, jakija pad kiraŭnictvam Maha Eŭlenijo Erery mahli zmahacca naroŭni z najmacniejšymi klubami Eŭropy. I ŭ 1968 h. Kapella vyjhraŭ razam z klubam Kubak krainy. Pavodle jahonaha pryznańnia, mienavita ŭ «Romie» jon vyras i staŭ zorkaj. Na žal, jon staŭ hierojem i adnoj z samych čornych staronak u historyi staličnaha klubu.

Adnak suśvietnaja słava pryjšła da jaho mienavita ŭ «Juventusie», kudy Fabijo pierajšoŭ u 1970-m. U turynskim klubie Kapella pravioŭ šeść hod, trojčy vyjhraŭšy skudeta dy staŭšy adnym z najmacniejšych centralnych paŭabaroncaŭ svajho času. Kapella zaprasili ŭ zbornuju, za jakuju jon pravioŭ 32 matčy dy zabiŭ vosiem hałoŭ.

U 1976 h. Fabijo rasstaŭsia ź «Juve» dy pierajšoŭ u «Milan». I znoŭ jaho čakaŭ pośpiech — skudeta, Kubak Italii. Ale ŭ 1980 h. rosa-nery vybyli ŭ seryju V, i Kapella paviesiŭ bucy na ćvik, vyrašyŭšy zaniacca trenerskaj dziejnaściu.

Trener

Fabijo skončyŭ trenerskija kursy i spačatku niekalki hadoŭ pracavaŭ z moładździu «Milanu». Pieršy trenerski dośvied pryjšoŭsia na 1986 h., ale «Milan» finišavaŭ tolki piatym. Kapella sastupaje pasadu trenera Aryha Saki i zasiarodžvajecca na pracy menedžeram, kaardynujučy ŭsie spartovyja prajekty chołdynhu siońniašniaha premjer-ministra Italii Sylvijo Berluskoni Mediulanum Sport. Aproč futbołu ŭ hrupu ŭvachodzili chakiej, rehbi, valejboł. Urešcie Saki pakinuŭ klub, i Berluskoni pryznačaje hałoŭnym treneram Kapella.

Don Fabijo ŭznačalvaŭ «Milan» z 1991 pa 1996 hod, vyjhraŭšy za hety čas čatyry čempijanaty (1992, 1993, 1994, 1996), try Superkubki (1992, 93, 94). Za Kapella «Milan» trojčy hulaŭ u finale Lihi čempijonaŭ, a ŭ 1994 h. vyjhraŭ hałoŭny trafej. Praz dva hady jaho pryznali najlepšym treneram śvietu. I niahledziačy na toje, što Berluskoni nastojliva prapanoŭvaŭ pierahledzieć kantrakt, Kapella sychodzić ź «Milanu» dy naahuł pakidaje Italiju.

Zavajavańnie Madrydu i Rymu

Sezon 1996/97 jon pravioŭ u madrydzkim «Reale», kudy byŭ zaprošany tahačasnym prezydentam klubu Larenca Sansam. Karaleŭski klub, što byŭ da hetaha ŭ zaniapadzie, z chodu vyjhraŭ čempijanat, pakinuŭšy z nosam hałoŭnaha kankurenta-voraha — «Barselonu». Ale pa skančeńni čempijanatu prymery Kapella admoviŭsia ad padaŭžeńnia kantraktu i viarnuŭsia ŭ «Milan». Ale dvojčy ŭvajści ŭ adnu i tuju ž vadu nie ŭdałosia — 11-je miesca ŭ 1997/98 h. Trener zaviazvaje z futbołam i hod pracuje televizijnym kamentataram na «RAI», adrynajučy ŭsie zaprašeńni. A voś ad prapanovy prezydenta «Romy» Franka Sensi jon nia zmoh admovicca. U pieršym sezonie «Roma» zaniała šostaje miesca, a ŭ 2000/01 h. vyjhrała skudeta.

Heta byŭ tryjumf rymskaha klubu, pra tyja časy ciapier možna zhadvać z nastalhijaj. «Roma» pakazvała pryhožy, vidoviščny futboł i znachodziłasia na viaršyni čempijanatu. U nastupny sezon džela-rosi finišavali druhimi i rychtavalisia da čarhovaha skudeta. Ale čempijanat 2002/03 z pryčyn finansavych i niaŭdałych transferaŭ byŭ pravaleny. Ramanisty finišavali tolki vośmymi. Kapella sabraŭ volu ŭ kułak, i ŭ nastupnym hodzie «Roma» znoŭ uklučyłasia ŭ čempijonskuju honku, tolki pry kancy pieršynstva sastupiŭšy «Milanu».

Nasupierak złym jazykam

Ale znoŭ umiašalisia finansavyja prablemy. Sarvałasia ździełka z mahnatami z «Nafty-Maskva», praz adsutnaść hrošaj klub ledźvie nie adpravili ŭ seryju V. Kapella nadakučyli niajasnaści ŭ losie klubu, jamu chaciełasia znoŭ vyjhrać čempijanat, a z adsutnaściu hrošaj u «ramanistaŭ» zrabić heta było ciažka. Uletku 2004-ha jon rašyŭsia na krok, jakoha jamu nia mohuć daravać fany «Romy». Jon pakinuŭ klub, pryčym pierajšoŭ u «Juventus» — zaklaty vorah rymskich klubaŭ. Złości zaŭziataram dadavała i toje, što trener «prychapiŭ» z saboj stryžań klubu: francuza Zebinu i brazylca Emersana. Z sychodam Kapella «Roma» pakaciłasia ŭniz pa turnirnaj tablicy, źmianiŭšy za hod čatyroch koŭčaŭ: Rudzi Fiolera, Karła Prandeli, Luidžy del Nery i Bruna Konci.

Skieptyki nia vieryli ŭ chutki pośpiech u «Juventusie». Da taho ž Kapella nie ličyŭsia z aŭtarytetami. Treba zamianić na futbolnym poli vizytoŭku klubu Alesandra del Pjery — kali łaska. Papiaredniki na takoje nie rašalisia. Sioj-toj nia vieryŭ, što kapryzny švedzki forvard «Juve» Złatan Ibrahimavič, jakoha Kapella kupiŭ u «Ajaksa», znojdzie svajo miesca ŭ Turynie. Ale Ibrahimavič nia tolki apraŭdaŭ nadziei trenera — jon zdabyŭ u čempijanacie ŭžo šasnaccać bramak.

U minuły ŭik-end don Fabijo pryvioŭ turynski klub da 28-ha (!) u stohadovaj historyi klubu skudeta, a sam staŭ pieršym treneram seryi A, jaki vyjhravaŭ italjanski čempijanat z tryma roznymi kamandami. I nie zabyvajem na hišpanski «Reał». Voś tolki jašče nie sprabavaŭ sp.Kapella siabie na pasadzie hałoŭnaha trenera jakoj-niebudź nacyjanalnaj zbornaj.

• 0
• 0
• 0
• 0
• 0
• 0
• 0
• 0