Pry kancy minułaha tydnia sudzili złačynnuju hrupoŭku, u składzie jakoj byli 14 mytnikaŭ na čale z byłym načalnikam upraŭleńnia arhanizacyi Dziaržaŭnaha mytnaha kamitetu Siarhiejem Dźmitryjevym.
Naprykancy minułaha tydnia znoŭ sudzili «złačynnuju hrupoŭku», u składzie jakoj byli 14 mytnikaŭ na čale z byłym načalnikam upraŭleńnia arhanizacyi Dziaržaŭnaha mytnaha kamiteta Biełarusi Siarhiejem Dzmitryjevym. Nahadajem, što «sprava Dzmitryjeva» ciahniecca jašče z 2005 hoda, a kali być dakładnym, z 2001‑ha. Jak zafiksavana ŭ prysudzie‑2005, jašče ŭ 2001 h. Siarhiej Dzmitryjeŭ «stvaryŭ kirujemuju ŭstojlivuju hrupoŭku z udziełam adkaznych asob Minskaj rehijanalnaj mytni, ź jakimi abjadnaŭsia dla atrymańnia chabaru na asnovie sumiesnaj arhanizacyi niezakonnaha mytnaha afarmleńnia asobnych vidaŭ tavaraŭ, jakija pierasiakali mytnuju miažu Biełarusi».
Tady Dzmitryjevu dali 13 hadoŭ pazbaŭleńnia voli z kanfiskacyjaj majomasci i adbyćciom pakarańnia ŭ kałonii ŭzmocnienaha režymu, načalnikam adździełaŭ mytnaha afarmleńnia Ivanu Siamionavu i Maksimu Parchamoviču — pa 11 hadoŭ. Jašče piaciora mytnikaŭ i siamiora kamiersantaŭ byli asudžany za ŭdzieł u złačynnych schiemach, dzie apisvajecca niezakonnaje afarmleńnie hruzaŭ papiery i kardonu, harbarnaj syraviny, kavy i šakaładnych kanfiet.
...A pačynałasia hetaja hučnaja sprava z zatrymańnia adnaho indyvidualnaha pradprymalnika, jaki «zajmaŭsia skuranymi vyrabami».
Nie budziem udavacca ŭ padrabiaznasci schiemy, jakuju raspracavali kamiersanty, adnak jana pavinna była ŭklučać u siabie «ŭstanaŭleńnie złačynnych suviaziaŭ z supracoŭnikami mytnych orhanaŭ i abjadnańnie z imi ŭ adzinaje złačynnaje farmiravańnie».
Na dumku suda, tady za afarmleńnie kožnaj fury ź niezakonnym hruzam mytniki atrymlivali pa 450 dołaraŭ. Paśviedčańnie vieterynarnaha ŭrača, naprykład, kaštavała mienš — 90 dołaraŭ.
Fihuravali ŭ spravie, iznoŭ‑taki na dumku suda, niezakonnyja pastaŭki papiery i kardonu vytvorčasci Čechii i Finlandyi, kali vysakajakasny tavar afarmlaŭsia z zanižanym mytnym koštam.
Pa razlikach śpiecyjalistaŭ, suma, jakoj niedaličyŭsia biudžet paśla afarmleńnia supracoŭnikami Minskaj rehijanalnaj mytni piaci partyj šakaładnych vyrabaŭ i kavy, vahałasia ŭ miežach 200 miljonaŭ rubloŭ.
Zaraz Siarhiej Dzmitryjeŭ i kampanija prachodzili pa novaj i, napeŭna, nie apošniaj kryminalnaj spravie. Dzmitryjeva asudzili na 13,6, Siamionava i Parchamoviča — na 11,3 hoda pazbaŭleńnia voli. Akramia taho, aryštavany niekalki dyrektaraŭ meblevych firm.
— Vy zadavoleny prysudam? — zapytaŭ ja paśla suda ŭ staršaha prakurora Siarhieja Ściabłova.
— Prakuratura daść kančatkovuju acenku prysudu paśla aznajamleńnia z im, — kaža jon. — Adnak u cełym pakarańnie ŭ niaznačnaj stupieni adroznivajecca ad taho, što prapanoŭvała dziaržaŭnaje abvinavačvańnie. Nakolki mnie viadoma, zaraz rasśledujecca jašče adna kryminalnaja sprava ŭ adnosinach da Dzmitryjeva. Tam fihuruje niezakonnaje mytnaje afarmleńnie hruzaŭ mebli.
Kamientary