Stań adzinym

Zhodna z Kanstytucyjaj, kožny hramadzianin maje šaniec 3 lipienia pryniać vajskovy parad, patančyć z moładździu na Kastryčnickaj abo inicyjavać referendum ab čarhovym pahłybleńni intehracyi z Rasiejaj abo EZ.

Kožny z nas moža stać prezydentam. Dla hetaha jość dva šlachi: być Łukašenkam abo stać adzinym kandydatam ad apazycyi i pieramahčy ŭ 2006 h. Žadajecie pasprabavać? Prapanujem vam praktykum u vyhladzie nastolnaj hulni.

Jak hulać

Najpierš znajdzicie sabie kankurentaŭ — takich ža, jak vy, ambitnych ludziej, kab hulać razam. Zrabicie fiški, jakimi budziecie «chadzić» (možna skarystać šachmatnyja fihurki ci nievialikija karaniapłody). Potym vaźmicie kubik, kidajcie jaho pa čarzie i ruchajciesia pa poli ŭ adpaviednaści ź ličbaj, jakaja vypadaje na kubiku. Traplajučy na kružki z numarami, hladzicie «Ŭmovy», što vas napatkała na ciarnistym kandydackim šlachu. Miescami vaša šancavańnie budzie zaležać ad taho, cotnaja ci niacotnaja ličba vypała vam na kubiku ŭ časie apošniaha chodu. Asobnaja ŭvaha — čornym kružkam. Kolki b vam ni vypała krokaŭ pa kubiku, na čornym kružku vy musicie spynicca i vykanać zadańnie pad adpaviednym numaram. U pracesie hulni vy budziecie nabirać bały. Pieramoža toj, chto nabiare ich najbolš. Kab ich kolkaść lepiej zapaminałasia, zapasiciesia jakim-niebudź ekvivalentam: zapałkami, drabkami cukru, ahurkami — chto što lubić. Poŭnymi kuflami, z ahladki na haračyniu, karystacca nie rekamendujecca. Ščaślivaj darohi!

Pahadnieńnie ab supracy

Ja, kandydat u kandydaty ŭ prezydenty, uračysta abiacaju niaŭchilna vykonvać umovy hulni, chadzić vyklučna pa kružkach u strohaj adpaviednaści ź likam, jaki vypadzie na kubiku. Kali ž ja parušu klatvu i pierastanu trymacca praviłaŭ hulni, niachaj moj televizar pa ŭsich kanałach pakazvaje tolki naviny BT.

Data

Podpis

Umovy

1. Kab zajmieć prava ŭdzielničać u hulni, padpišycie pahadnieńnie ab supracy.

2. Vy zapisalisia ŭ adnu ź piaci partyj «Demakratyčnaj kaalicyi». Partyjny schod maje vyłučyć vas u kandydaty. Adnak navat zabaŭlalny kompleks «Žuravinka» i Mienski zaapark paśla zvanka z Administracyi nie pahadžajucca dać pamiaškańnie dla schodu. Daviadziecca hałasavać na vulicy. Kali ŭ časie apošniaha chodu vam vypaŭ niacotny lik, vas adrazu aryštavali za niesankcyjanavany pikiet. Viarniciesia na dva kroki nazad. Kali cotny — vas zabrali ŭ pastarunak tolki paśla taho, jak schod adnahałosna prahałasavaŭ za vašuju kandydaturu. Praciahvajcie šlach.

3. Vy raskałoli adnu sa šmatlikich sacyjał-demakratyčnych partyj krainy i stvarajecie z vašymi prychilnikami novuju partyju. Treba, kab jaje zarehistravaŭ Minjust. Heta doŭhi i nudny praces. Kali vam vypaŭ niacot — kirujcie ŭleva, u maraton pa čynoŭnickich kabinetach. Kali lik cotny — uprava. Vinšujem, rehistracyja prajšła nadziva hładka.

4. Papiarednija vybary ŭ Horadni. Cot — vy pieramahli, dadajcie sabie adzin bał i idzicie dalej. Niacot — na haradzienskim vakzale na vas sieŭ roj z pasieki Alaksandra Milinkieviča. Schod napałochaŭsia vašaha vyhladu i raźbiehsia. Prapuścicie chod i paprykładajcie da tvaru chałodnyja kampresy.

5. Niezaležnaja presa nadrukavała manifest vašaha ruchu «Vola nacyi». Paśla hetaha niekatoryja padpisanty (u tym liku pamierłyja) zajavili, što podpisy pad manifestam pastavili biaź ich viedama. Doŭhaja sudovaja kaniciel. Prapuścicie chod.

6. Kab pierastrachavacca ad aranžavaj revalucyi ŭ 2006 h., ułada vyrašyła abiasškodzić lideraŭ vuličnaj apazycyi. Kali ŭ časie apošniaha chodu vam vypaŭ cot, vy — akularyk i nievialiki achvotnik stajać u pikietach. Kali niacot — vy zdarovy buhaj, jaki pa kolkaści chodak na Akreścina daŭno pieraplunuŭ Ščukina. Vam inkryminujuć pierachod vulicy na čyrvonaje śviatło ŭ 1997 h., interpretujučy heta jak masavyja biesparadki, i adpraŭlajuć vas na «chimiju». Viartajciesia na pačatak hulni.

7. Rehijanalnaje hałasavańnie ŭ Homieli. Kali majecie cot, vy pieramahli. Vaźmicie sabie drabočak cukru (ci čym tam u vas paznačajucca atrymanyja bały) i rabicie chod. Kali vypaŭ niacot, na padjeździe da horadu vas spyniŭ milicejski patrul. Na prajmeryz vy spaźnilisia. Ciapier abo raskažycie na pamiać himn Respubliki Biełarusi i jedźcie sabie dalej, abo prapuskajcie chod.

8. Vas zaprasili paŭdzielničać u tok-šoŭ «Da barjeru» na rasiejskim kanale NTV. Vam supraćstaić sakratar sajuznaj dziaržavy Pavał Baradzin. Niacot paznačaje, što Baradzin zrabiŭ vas jak maskala pad Voršaj, davioŭšy, što paśla ŭviadzieńnia adzinaj valuty chleb u Biełarusi budzie kaštavać 100 rubloŭ. Adstupicie na dva kroki nazad. Kali vypaŭ cot, usio naadvarot. Vašamu tezisu «Adzinaja valuta — heta pavieličeńnie cany na chleb u try razy» Baradzin moža procistavić tolki «E-e-e-e». Poŭnaja viktoryja. Uvieś SND u zachapleńni ad vašaha palityčnaha hieniju. Dadatkovyja dva kroki napierad u časie nastupnaha chodu.

9. Rehijanalnyja prajmeryz u Bieraści. Kali majecie cot — vy pieramahli. Dadajcie sabie adzin bał.

10. Vy zrabili sabie radykalny pirsinh, i elektarat pierastaŭ vas paznavać. Minus adzin krok u časie nastupnaha chodu.

11. BT pryśviaciła vam prahramu «Ŭ centry ŭvahi». Ź jaje vy daznalisia, što śsiecie hranty, užyvajecie narkatu, pieraśledujecie niepaŭnaletnich. A ŭ sabaki vašaha pryščepak niama. Zatoje elektarat znoŭ pačaŭ paznavać. Plus adzin krok u časie nastupnaha chodu.

12. Vas vyklikali ŭ KDB i prapanavali ciopłaje miesca pamočnika namieśnika pa suviaziach z ekalohiaj z akładam i słužbovym «Maskvičom-412». Kali niacot — chod abminaje vas, pakul vy znachodziciesia ŭ šokavym stanie.

13. Rehijanalnyja prajmeryz na Mahiloŭščynie. Kali majecie cot — dadajcie sabie bał. Ale pakul vy pieramahali, chtości praparoŭ koły vašaj «Vołzie». Minus adzin krok u časie nastupnaha chodu.

14. Padčas sustrečy z vybarščykami ŭ Pinsku «zubroŭcy» spytali, ci hatovyja vy vyvieści ludziej na płošču i adstajać vyniki vybaraŭ. Kab usich pierakanać, demanstrujecie pryjom kun-fu. Kali niacot — vy złamali nahu. Tracicie adzin bał. Kali cot — prabili nahoj ścianu chleŭčuka, u jakim adbyvałasia sustreča. «Zubry» zrazumieli, što Vy i jość biełaruski Saakašvili. Dadatkovy krok u časie nastupnaha chodu.

15. Rehijanalnyja prajmeryz u Mienskaj vobłaści. Kali cot — vy vyjhrali, dadajcie sabie adzin bał. Kali niacot — vas vyklikali ŭ KDB (viartajeciesia ŭ punkt 12).

16. U ranhu baćki biełaruskaj demakratyi vy jedziecie za miažu čytać lekcyju. U piacizorkavym hateli achapiła spakusa — plunuć na ŭsio i paprasić prytułku na tłustym Zachadzie. Kali vam vypaŭ niacot, straŭnik časova tryjumfuje nad śviadomaściu. Prapuścicie chod i biažycie ŭ susiedni «Adidas», pakul nia skončyŭsia rasprodaž. A zaadno razdajcie kankurentam svaje bały (paroŭnu). Kali cot, vy vytrymali spakusu. Baraćba praciahvajecca!

17. Papiarednija vybary ŭ Miensku. Kali ŭ časie papiaredniaha chodu vy mieli cot — dadajcie sabie bał. Kali nie — vy prasiedzieli hałasavańnie na bieraściejskaj mytni. Ciahnik, jakim vy viartalisia z-za miažy, zabylisia apuścić padčas zamieny kołaŭ.

18. U Vašaj kvatery vobšuk. Niečakana dla vas znajšli patrony, snarady, ulotki Labiedźki, mieč kniazia Viački i hłybakavodnuju bombu ŭ akvaryjumie. Kryminalnaja sprava. Vybyvajecie z hulni.

19. Ahulnanacyjanalnyja vybary ŭdzielnikaŭ Usiebiełaruskaha kanhresu demakratyčnych siłaŭ. Ad jaho składu mnohaje zaležyć. Kali vypaŭ niacot — kolkaść vašych prychilnikaŭ na Kanhresie budzie minimalnaja. Choć jašče jość šaniec pierakanać aŭdytoryju niepasredna padčas Kanhresu. Vy vyklikajecie najlepšych imidžmejkieraŭ i rychtujecie svoj vychad. Ale dla hetaha pryjdziecca prapuścić chod. Na kubiku byŭ cotny lik? 99% udzielnikaŭ Kanhresu patencyjna za vas! Dadajcie sabie dva bonusnyja bały.

20. Voś jon, doŭhačakany Usiebiełaruski kanhres demakratyčnych siłaŭ. Pačynajecca histaryčnaje hałasavańnie. Kidajcie kubik — i da taho liku, jaki vypadzie, dadajcie kolkaść bałaŭ, atrymanych ciaham hulni. Tamu, chto pryjšoŭ da finišu pieršy — plus adzin bał. Kali ŭ vas najbolš — vy pieramožca! Rychtujciesia da śmiarotnaha dvuboju z adzinym kandydatam ad ułady. Kali ž vaš kaleha nabraŭ bolej bałaŭ — taksama nie sumujcie. Zhulajcie ź im u 2011 hod.

Hulniu z umovami i hulniavym polem šukajcie ŭ papiarovaj i pdf-versii “Našaj Nivy”

• 0
• 0
• 0
• 0
• 0
• 0
• 0
• 0