U KDB za LLL-multy

Zatrymany aŭtar multfilmaŭ pra Łukašenku. «Na aŭtorak vyklikaŭ telemajstra, ranicoju — zvanok u dźviery. «Chto?» — pytaju. «Telemajstar!» — u adkaz. U kvateru zajšli pradstaŭniki KDB, pakazaŭšy paśviedčańni, adrazu z «paniatymi». «Nie bajusia pieraśledu, a voś da čaho maralna nie padrychtavany, dyk heta da niaščasnaha vypadku. Ci abvieściać «narkadyleram» abo «handlarom zbroi». Jany ž razumnyja», — kazaŭ u minułym numary «NN» Viktar Bazukievič, stvaralnik palityčnych LLL-multfilmaŭ. U aŭtorak šeść supracoŭnikaŭ haradzienskaha ŭpraŭleńnia KDB uvarvalisia ŭ jahonuju kvateru a 8-j ranicy.

Skanfiskavali vinčester, manitor, skaner, klavijaturu, usie CD, dyskiety, navat natatniki. Zatrymali i haspadara kvatery. Pra heta paviedamiła Viktarava žonka. «Majho muža abvinačvajuć pa artykule «paklop u dačynieńni da prezydenta» (art. 367, č.1) i praviali pieratrus. Kali jaho vyzvalać — nieviadoma», — suchija radki elektronnaha lista, jaki ja atrymaŭ udzień.

Padrabiaznaści raskazaŭ Viktar uviečary, kali jaho adpuścili pad padpisku ab niavyjeździe. «Usio vyjšła niečakana: na aŭtorak vyklikaŭ telemajstra, ranicoju — zvanok u dźviery. «Chto?» — pytaju. «Telemajstar!» — u adkaz. U kvateru zajšli pradstaŭniki KDB, pakazaŭšy paśviedčańni, adrazu sa «śviedkami». A ŭ mianie na ekranie manitora jakraz scena z novaj seryi «Mult-klubu», tak što adpiracca nie vypadała».

Animatara, na absiahach Bajnetu viadomaha jak Viktar Bazukievič, nasamreč zavuć Aleh. Kala šaści hadzin jaho trymali na dopycie ŭ KDB. Respublikanskaja prakuratura zaviała spravu pa artykule «źniavaha prezydenta». U jakaści dokazu buduć pradastaŭleny 28 seryj multfilmaŭ, vykładzienyja na sajcie www.mult.3dway.org, i asabistaja pierapiska Viktara/Aleha.

Na dopycie Alehu skazali, što jamu minimum «śviecić» «chimija». Maksymum pa hetym artykule — čatyry hady pazbaŭleńnia voli. «Ja ŭ šoku, ale mianie nie zapužali», — kaža chłopiec. Śledčy Valancin Tałočka ŭ telefonnaj razmovie admoviŭsia paćviardžać hetuju infarmacyju: «Ja mahu z vami razmaŭlać tady, kali ŭbaču vašaje paśviedčańnie».

Toj ža ranicaj u Miensku supracoŭniki mienskaha ŭpraŭleńnia KDB zavitali na kvatere da Paŭła Marozava — kaardynatara hramadzkaj inicyjatyvy «Treci šlach». Na jaje sajcie źmiaščajucca ŭsie multfilmy. Pavał apaviadaje, što supracoŭniki KDB pakazali sankcyju prakurora Mienskaj vobłaści na vobšuk kvatery, kanfiskavali ŭ jaho systemny blok kamputara, usie dyski i papiery dy vyklikali na dopyt, jaki pravodziŭsia ŭ budynku mienskaha ŭpraŭleńnia KDB.

«Pytali pra «Treci šlach» i «Mult-klub», pra majo dačynieńnie da hetaj spravy. Ja im ščyra ŭsio raskazaŭ». Pavał zacikaviŭsia mult-prajektam, jak tolki jon źjaviŭsia, i ŭ kastryčniku 2004 h. prapanavaŭ jaho stvaralniku internet-placoŭku — sajt «Treciaha šlachu» — i techničnuju padtrymku. «Ale ja nikoli nia bačyŭ hetaha Viktara, bo tolki pierapisvaŭsia ź im. I mnie nie było čaho chavać», — kaža Pavał.

Pieratreśli i kvateru prahramista Andreja Abozava, jaki sajt z multami absłuhoŭvaje. Prahramista Andreja pradčuvańnie nie pakidała ź viečara paniadziełaka, jon navat ćviordy dysk sa svajho kamputara źniaŭ, ale nie paśpieŭ zanieści da znajomych. Andrej zajmajecca ramontam kamputarnaha abstalavańnia, i supracoŭniki KDB kanfiskavali 11 systemnych blokaŭ.

«Śmiechu budzie, kali sudździa paličyć hałoŭnuju śvińniu ŭ seryi «Ŭłada śviniej» prezydentam. Ja ž pišu, što supadzieńni persanažaŭ z realnymi asobami vypadkovyja», — žartavaŭ u tym samym apošnim liście Viktar. Kali ŭłady jaho pakarajuć, to daduć tym samym mocny šturšok da raźvićcia biełaruskaj fłeš-animacyi. «Multy ŭsio roŭna buduć źjaŭlacca, navat, kali ich budzie nia Viktar malavać». U sieradu byŭ vyrubleny sajt «Mult-klubu», ale ŭ Bajnecie ŭžo niekalki čałaviek zajavili, što praciahnuć spravu. Salidarnaść ź biełaruskim animataram užo vykazali jaho polskija kalehi i stvaralnik ukrainskich palityčnych fłeš-filmaŭ Michaił Barkoŭski.

∎

Pieršyja seryi svaich fłeš-filmaŭ Viktar namalavaŭ paśla zajavy Łukašenki ab padaŭžeńni svaich paŭnamoctvaŭ praź plebiscyt. Za pieršyja ž dva tydni z dapamohaj Internetu ich pahladzieli pad 10 000 čałaviek. Hieroi multfilmaŭ — najpierš prezydent i jaho kamanda, žurnalisty dziaržaŭnych ŚMI i niekatoryja apazycyjnyja dziejačy. Paradzirujucca prahramy «Kontury», «Postkryptum», «Panarama». Za hod isnavańnia prajektu jaho naviedali 170 000 čałaviek. Vypusk multfilmaŭ zaplanavany na videa.

∎

Elehantnaja pieramoha Z 28-j seryi «Mult-klubu»

Multy zbudavanyja na siužetach nastupnaha kštałtu:

Čałaviek, padobny da prezydenta, u svaim kabinecie hulaje ŭ nastolny chakiej: «Lublu hulać sam z saboj!» Uvachodzić načalnik KDB, i čałaviek chucieńka zajmaje svajo pracoŭnaje miesca. Toj dakładvaje: «Maje chłopcy tolki što z Varšavy. Dzieci rasiejskich dyplamataŭ źbity. Skandał nabyvaje abaroty. Vaša zadańnie vykanali».

— Vas nie zasiakli?

— Rasiejcy abvinavacili va ŭsim palakaŭ.

— Vydatna, vypišy svaim chłopcam premiju. Usio — ty volny.

Kamičny efekt stvarajecca za košt paradyčnaje pieradačy movy persanažaŭ, hrateskavych malunkaŭ i viasiołaje muzyki.

• 0
• 0
• 0
• 0
• 0
• 0
• 0
• 0