Ščučyn: nia «domam polskim» adzinym…

Pad kaniec žniŭnia horad pamiž Lidaj i Horadniaj žyvie tradycyjnym «śviatam kvietak» dy vypravami na lecišča. Z 16 tysiač žycharoŭ šachmaty tut mała kamu da hałavy. Tym nia mienš, karespandentu «NN» udałosia zhulać kolki partyj sa ščučynskimi šachmatystami.

Hałoŭnym apiryščam tutejšych prychilnikaŭ Kaisy — bahini šachmat — słužyć rajonny dom kultury. Tamaka, praz adsutnaść klubu, jany źbirajucca ledź nie štodzionna — u addalenym zakutku pa susiedstvie z «pakojem dla maładych». Pobač ZAHS, dyskateka, restaran.

Viktar Hardziejeŭ, čempijon horadu, ahranom z vajskovaj pastavaj, viadzie hurtok dla pačatkoŭcaŭ. Uvosień jamu davodzicca papachadzić pa škołach, kab zavabić vučniaŭ «na šachmaty». Niekalki hod u Ščučynie ładzicca festyval «Ščučynskaja viasna», dzie možna vyjhrać radyjopryjomnik «Akijan» abo «Horadnia», nia kažučy pra pieknyja suvenirnyja vyraby lidzkaha škłozavodu. Adnak — što dalej?

18-hadovy Dźmitry Žvaciel, pieramožca sioletniaj «Viasny», pryznajecca, što paśla pamiatnaha turniru ŭ krasaviku čatyry miesiacy nidzie nie hulaŭ. Mahčymaść udziełu ŭ vieraśnioŭskaj spartakijadzie rabotnikaŭ kultury jaho nie zachaplaje: perspektyŭny pieršarazradnik źbirajecca hryźci navuku ŭ Horadni. Pakrysie źjaždžajuć ź miastečka i inšyja maładyja hulcy. Tamu sp.Hardziejeŭ havoryć pra «źmienu pakaleńniaŭ», a da taho ž skardzicca na straty, niezvarotnyja dla ščučynskich šachmat. Pazaletaś pamior apantany hulec Mikałaj Budźko, hod tamu — Andrej Siarhiej, bliskučy arhanizatar. Kvalifikavanych kadraŭ u miastečku brakuje, tamu vychodzić, što pensijaner Hardziejeŭ — i šviec, i žniec… Šachmatyst z 55-hadovym stažam, asabista znajomy z Branštejnam i Tajmanavym, jon hulaje praź pierapisku ŭ Kubku Biełarusi, piša ŭ rajhazetu pra arhanizavanyja im samim spabornictvy dy jašče łabiruje ŭ miascovym «Čyrvonym domie» adkryćcio ŭ Ščučynie sapraŭdnaha šachmatna-šašačnaha klubu. Biez asablivaha pośpiechu: niekali bahaty rajon ciapier ličycca «datacyjnym».

Da abłasnoj dyj nacyjanalnaj federacyj šachmat sp.Hardziejeŭ stavicca strymana: my, maŭlaŭ, i biaź ich možam zaprasić na našy imprezy šachmatystaŭ z Horadni, Smarhoni, Lidy, Vaŭkavysku. Samastojnaść — reč dobraja, adnak ci padmacavana jana materyjalna? Dobra jašče, što hrošy na turnirnyja pryzy časam padkidvajuć znakamity «Aŭtaprovad», masłasyrzavod, pryvatnyja pradprymalniki.

Jak dla rajcentru, u Ščučynie šachmaty badaj kvitniejuć. Jak dla rehijanalnaha flahmanu — siłaŭ tut małavata. Aptymizmu dadaje chiba toje, što kahadzie ŭ nia nadta dalokich Vasiliškach adkryŭsia šachmatny hurtok pry prafsajuznym spartovym klubie, a ŭ vioscy Rakavičy były nastaŭnik Viktar Prakapovič samachoć vykładaje dzieciam praviły hulni. Značyć, ściažyna da kultury šachmat zastaniecca prataptanaj.

VR

• 0
• 0
• 0
• 0
• 0
• 0
• 0
• 0